КIварчагърин дередай — КIварчагърин, Экен­рин, Нуь­цIуьгърин ва Зизикрин хуьрерай — тIвар-ван авай алимар, чIехи де­ре­жайрин гьакимар, спортсменар, гьар са рекьяй хъсан пешекарар акъатна. Ма­нидаррин,­ музыкантрин, культработник­рин, ис­кус­ст­водин устадрин жигьетдайни КIвар­чагъ дере кесиб туш. И кар къалурун патал Жамал Шагьмарданован, Са­лигь Селимован, Алимирзе Сулейманован, Омар Абдурагьимован, Зейнулагь­ Нав­рузован, Шихсаид Шихнабиеван, Ших­бала Шихнабиеван ва масабурун тIва­­­­рар кьаз жеда. Къенин суьгьбет бажарагълу манидар, музыкант, культработ­ник, республикадин фестивалрин лауреат нуьцIуьгъви Шихнабиев Шихсаид Бабаевичакай я.

Ш. Шихнабиева школада кIелзавай йисара манияр лугьуз, вичи-вичиз музыкадин­ алатар ягъиз чирна. Са шумудра ада КIварчагъ дередин хуьрера, Кьасумхуьрел тухвай шадвилинни культурадин мярекатра иштиракна ва ам  грамотайриз лайихлу хьана.

НуьцIуьгърин юкьван школа акьалтIарай Ш. Шихнабиев гъвечIи чIавалай вичин рикIе авай мурад кьилиз акъудун патал Избербашдин педучилищедин музыкадин отделенидик экечIна. 1980-йисуз анаг акьалтIарна.

Армияда къуллугъна хтайдалай гуьгъуьниз ада са тIимил вахтунда Дербентдин педучилищеда вичин рекьяй муаллимвилени зегьмет чIугуна. 1985-йисалай инихъ Шихсаид Бабаевича НуьцIуьгърин хуьруьн культурадин кIвалин директорвиле кIвалахзава. Хиве авай асул везифаяр намуслудаказ кьилиз акъудунилай гъейри, ада КIварчагърин дереда, районда ва масанра кьиле физвай культурадинни шадвилин мярекатра иштиракзава, манидар, музыкант, гьевескар артист яз, агьалийрин гуьгьуьлар шадарзава.

Ш. Шихнабиева устаддаказ манияр тамамарзава, кларнет, зуьрне, далдам­ ва милли маса алатар язава. Кьилди къачуртIа, Шихсаид «Кьасумхуьруьн далдамчияр» халкьдин ансамблдин, И.Гь. Тагьи­рован тIва­рунихъ галай райондин культурадин имаратдин художественный самодеятельностдин, «Куьре» ансамблдин активный иштиракчи я. Саки 10 йисуз Ш. Шихнабиева КIварчагъ дередин культурадинни ял ягъунин центрадиз (КДЦ-диз) регьбервал гана, ам районда хъсанбурун жергедиз акъудна. Эхиримжи йисара бажарагълу музыкантди, манидарди 5 касдикай ибарат тир «КIварчагъ дере» ансамблдизни регьбервал гузва.

Шихсаид Бабаевичан стхаяр, вахар, хтуларни манидарар, музыкантар я. Дереда мукьвал-мукьвал кьиле тухузвай мярекат­ра абуруни иштиракзава. Манидар, музыкант яз, Ш. Шихнабиева­ Кьасумхуьрел, гьакI Кьиблепатан Дагъус­тандин районра, Махачкъалада тухвай конкурсра, фестивалра иштиракна, лауреатвилин тIварар къачуна. Культурадин кIвалин директор яз,  Ш. Ших­набиева хуьруьнвийриз намуслудаказ къуллугъзава, хуьре Яран сувариз, адетриз ва лишанлу вакъиайризни сувариз ­талукьарнавай мярекатар тешкилзава.

Ш. Шихнабиева регьбервал гузвай культурадин маканда са шумуд кружок кардик ква. Ватандин ЧIехи дяведин ва махсус серенжемдин иштиракчийриз, СтIал Сулейманаз, хуьруьн тарихдиз талукьарнавай ва маса стендарни ава.

— Культура, искусство, манияр, авазар галачиз завай уьмуьр фикирдиз гъиз жедач, — лугьузва Ш. Шихнабиева. — Зи кеспийри, машгъулатри заз руьгьдин таъминвал, инсанриз шадвал гузва. Гьавиляй завай лугьуз жеда: зун жуван кьисметдилай, уьмуьрдилай гзаф рази я.

Маниярни авазар галаз физвай ви уьмуьр­ экуьди ва яргъиди хьурай, гьуьрметлу Шихсаид Бабаевич!

Хазран  Кьасумов