Россиядин Яшайишдин фондунин (СФР) Дагъустанда авай отделенидин пресс-къуллугъдин малуматда хабар гузвайвал, алай вахтунда лутуйри цIийи къайдада пулар къакъудзава. ИкI, вири пенсионерар рекъем­рин­ пулунал алудзава лугьуз, соцсетра тапан хабарар чукIу­риз, яни рекъемрин пулуникай «отказ авун патал» арза гун лазим я лугьуналди, пенсия къвезвай картадин нумра чпив агакьардай рекьер жагъурзава. Абу­рун чIалахъ хьун ахмакьвал я.

– Россиядин Яшайишдин фондуни, гьа гьисабдай яз, Дагъустанда авай отделенидини, пенсия гуя рекъемринбурал алудзава лугьудай хабар дуьзди туш. Гьаниз килигна, агьалийри «отказ авунин» арзаяр кхьинин лазимвални авач. Республикадин муьштерийрихъ галаз кIвалахдай къуллугъра тапан малуматра раижзавай жуьредин махсус формаярни авач, – къейдзава Россиядин Яшайишдин фондунин Дагъустанда авай отделенидин управляющийдин везифаяр тамамарзавай Алжанат Загьидовади.

Малуматда мадни хабар гузвайвал, лутуйрин ният агьалийрин арада къалабулух тун, чпин чIуру къастар кьилиз акъудун я. ГьикI хьи, рекъемрин пулунал алудуникай къурхулувал, кичI акатуникди инсанди, фагьум тавуна, вичиз талукь делилар (персональные данные) абурал агакьарзава. Лутуйриз кIанзавайдини гьа и кар я – пенсио­нердин пул къакъуддайвал, лазим делилар чпин гъиле гьатун. Гьаниз килигна, СФР-дин Дагъустанда авай отделениди и жуьредин малуматриз фикир тагуниз эвер гузва.

— Генани квез «тади гьалда», «са декьикьадин вахтунда», «счёт блокироватда», «пул чуьнуьхда» лугьуз, кичIерар гузватIа, абур лутуяр тирди гьасятда чир хьухь!  Ихьтин хабарар масабурув – танишрив, мукьва-кьилийрив агакьарна, агьалийрин арада къалабулух туна виже къведач, – гъавурда твазва А. Загьидовади.

Яшайишдин рекьяй куьмекдин ва гузвай пуларин жигьет­дай дуьз ва тамам малуматар квевай Россиядин Яшайишдин фондунин официальный сайтдай ва я куьн яшамиш жезвай чкада кардик квай муьштерийрихъ галаз кIва­лахдай къуллугърай, гьакIни Вконтакте, Одноклассники соцсет­ра, Телеграм-каналда ва МАХ мес­сенджерда къачуз жеда.

Рагнеда  Рамалданова