Казимов Казим  Мегьамедшерифович. Дагъустандин милли прессадин агъсакъал. Вичин вири уьмуьр багъри «Лезги газетдиз», хайи чIалаз, милли культурадиз, руьгьдин ивирриз бахшнавай кас. И баркаллу рекье вичин вилерин экв къурбанднавай чIехи ватанперес. РД-дин культурадин лайихлу работник, Гьажибег Гьажибегован, Мегьамед Гьажиеван тIварарихъ галай премийрин лауреат. Журналистриз гузвай «Дагъустандин къизилдин къелем» премиядин сагьиб.

Ери-бине Ахцегь райондин Ялахърин хуьряй тир и камаллу лезгидин къелемдикай вишералди зарисовкаярни фельетонар, шиирарни эссеяр, гьикаяярни повестар, «Имамали-бег» роман, «Девирдин къван», «Хважамжамдин къужахда», «Дидедин аманат» ктабар хкатнава. Казим Казимован «Дидедин намус» пьеса Лезгийрин СтIал Сулейманан тIварунихъ галай театрди сегьнеламишна.

ЧIехи Гъалибвилин суварин вилик «Лезги газетдин» векилар хейлин йисара газетда культурадин отделдин редактор яз кIвалахай Казим Казимоваз мугьман хьана. Вилериз ерли экв ахквазмачтIани, Казим Мегьамедшерифовичан рикIи вичихъ галай санал кIвалахай юлдашрин – Мегьамед Ибрагьимован, Муса Агьмедован, Шихмурад Шихмурадован, Алаудин Гьамидован, Даир Бейбалаеван, Мердали Жалилован, Нариман Ибрагьимован, Эмираслан Шерифалиеван, Шагьисмаил Гьажимирзоеван патай авай чIехи гьуьрметни хатур гьиссна. Журналистикадин сирерай хъсандиз кьил акъатзавай агъсакъалди «Лезги газетдин» ери мадни хъсанарунин жигьетдай хейлин насигьатар, меслятар гана, газетдикай вичин фикирар лагьана.

Газетдин векилри чпин нубатда Казим Казимовахъ чандин сагъвал, руьгьдин кIубанвал хьун алхишна.

«Лезги газет»