2027-йисан сентябрдилай Россиядин мектебрин 5-11-класс­ра, чарасузди тир цIийи курсунин сергьятра аваз, тIебии тушир интеллект ва делилрин хатасузвал  чириз  башламиш­да. Идакай РФ-дин просвещенидин министр Сергей Кравцова  9-ок­тябр­диз кьиле фейи «Иннополисдин рекъемрин йикъар» форумдал хабар гана.

ЦIийи тарсуни мектебра кIелзавай аялриз  тIебии тушир интеллектди гьикI кIвалахзаватIа, ада гьихьтин мумкинвилер ачухзаватIа, ам ишлемишдайла, гьихьтин къурхуяр фикирда кьун важиблу ятIа, гьадай кьил акъудиз куьмекда. Кьилдин фикир делилрин хатасузвилин месэладиз гуда.

Дагъустанда цIийи курс кардик кутунин кIвалах гиламаз гъиле кьунва, хабар гузва РД-дин образованидин ва илимдин министерстводи. Программа тежрибада ахтармишунин карда­ республикадин ирид мектебди иштиракда: Каспийскда авай «Республикадин И.И. Ханбалаеван тIварунихъ галай образова­нидин центради», «СтIал Сулейманан тIварунихъ галай  11-нумрадин гимназияди», «Р.Гьамзатован тIварунихъ галай 13-нумрадин лицейди»,  Махачкъалада авай «Ф.Г. Алиевадин  тIварунихъ галай 61-нумрадин школади», Буйнакск шегьердин «А.Н.Хуторянскийдин тIварунихъ галай гимназияди» ва «М.М. Мегьамедован тIварунихъ галай образованидин центради», гьакIни Дербент шегьердин «Я.И. Хорольцан тIварунихъ галай 14-нумрадин СОШ-ди».

ЦIийи тарс ахтармишунин кIвалах кIелунин алай йисан кьвед лагьай четвертдилай башламишун пландик кутунва. Идалай кьулухъ лагьайтIа, кIватIнавай тежриба  образованидин маса идарайрани раиждайвал я.

ТIебии тушир интеллектдиз талукь чирвилер гудай муаллимри чпин пешекарвилин дережа хкажун, гьакIни тарс тухунин къайдадиз талукьарна тешкилзавай семинаррани вебинарра иштиракун чарасуз я.  Анжах лазим тир гьазурвал акурдалай кьулухъ мектебривай  и курс, тарсарилай къерехдай тухузвай кIвалах яз, уьмуьрдиз кечирмишун тешкилиз жеда.

Курсунин асул везифа мектебра кIелзавай аялар рекъемрин дуьньяда яшамиш жез гьазурун я: ина неинки технологийрикай менфят къачуз, гьакIни и кар савадлудаказ ва хатасуздаказ гьикI ийидатIа чир хьун важиблу я, гьисабзава министерст­водин пешекарри.

Чи мухбир