Кьве сеферда гзаф
2026-йисан сифтегьан ругуд вацра Дагъустанда маса гун патал гьасилнавай форелдин кьадар 1 494,8 тонндив агакьнава. Алатай йисан гьа и вахтунив гекъигайла, адан кьадар кьве сеферда гзаф хьанва.
«Сифтегьан ругуд вацран вахтунда базардив 346,3 тонн форель агакьарнава. Им лагьайтIа, 2025-йисан сифтегьан ругуд вацран кьадардилай 57 процентдин гзаф я», – къейдзава РД-дин балугъчивилин комитетди.
Гьисабзавайвал, гьасилзавай форелдин кьадар гзафардай мумкинвал республикадин мулкунал уьмуьрдиз кечирмишзавай чIехи инвестпроектри гана. Дагъустанда ихьтин 20 майишат ава.
«И хиле кIвенкIвечи чкадал зурба инвестпроектдин сергьятра аваз арадал гъанвай «Ирганайдин форель» ООО алама – карханадихъ йисан къене 3 агъзур тонндив агакьна балугъар гьавизра гьасилдай мумкинвал ава. 2026-йисан сифтегьан ругуд вацра Ирганайдин цин гьамбарханада 1 402,2 тонн радужный форель гьасилнава, и кьадардикай 315,2 тонн маса ганва», – хабар гузва Комитетдин векилди.
Гьа са вахтунда Дагъустандин балугъчивилин вири майишатри 2026-йисан сифтегьан ругуд вацран вахтунда маса гудай 7 агъзур тонн балугъ (алатай йисан гьа и вахтунив гекъигайла, саки сад хьтин кьадар) гьасилнава.
Идаради къейдзавайвал, 2026-йисан январь-июнь варцара Дагъустандин мулкунал гьасилнавай балугърин умуми кьадар саки пудан са паюнив агакьдалди агъуз хьанва – 15,4 агъзур тонн. И кардин кьилин себебрик гьуьлуьн дережа агъуз хьун ва балугъар кьадай асул сезондин вахтунда тIебиатдин шартIар хъсанбур тахьун акатзава.
Къейд ийин, и йикъара Къаякент районда балугъчивилин хилен мад са инвестпроект гъиле кьунва. Ина багьа жинсерин балугъар гьасилдай майишат арадал гъида. Балугъчивилин къурулушдин проект нетижалуди авун патал капитальный ва капитальный тушир жуьредин дараматар, алай аямдин тадаракар ва технологияр кардик кутунва.
Сифтегьан вахтунда майишатди йиса тахминан 30 тонн маса гудай балугъ гьасилдайвал я, гуьгъуьнлай мумкинвилер артухарда.
Жасмина Саидова