Гад гьарай я лугьузва бубайрин мисалда. Гьакъикъатдани, гад чуьлдин кIвалахрин къизгъин вахт я. Гатун и йикъара хуьруьн майишатдин карханайрин, лежбервилинни фермервилин майишатрин зегьметчийри, арендаторри багъаларани уьзуьмлухра, саларани производстводин маса хилера агротехникадин серенжемар кьиле тухузва, салан майваяр, емишар, бустандин няметар кIватI хъийизва. Гатун са йикъа хъуьтIуьн са варз тухарда лугьудай мисалдихъ бине ава.
Гьелбетда, алай вахтунда хуьруьн майишатдин карханайрин, КФХ-рин ва арендаторрин вилик акъвазнавай асул везифайрикай сад агакьнавай гад вахтунда, пучвилер авачиз, кIватI хъувун я. Важиблу и кампаниядив СтIал Сулейманан райондин карханаяр хъсан гьазурвилер акуналди эгечIнава. И кар Испикрин хуьре кардик квай «Новый путь» СПК-ди калун участокда (Мегьарамдхуьруьн райондин Яру Кьваларин хуьруьн мулкуна авай) сифте яз башламишна.
Райондин хуьруьн майишатдин ва суьрсетдин управленидин начальник Къазиагьмед Къазиагьмедовахъ ва адан заместитель Къазиагьмед Абумислимовахъ галаз чун гад агудзавай никIиз фена. Пакаман кьиляй акъатнавай кьезил шагьвардал къизилдин ранг алай къуьлуьн кьилери лепе гузва, гуя абуру чеб битмишарай лежберриз, юкь агъузна, икрамзава.
— Чахъ 48 гектар зулун магьсулрин никIер ава, — лугьузва СПК-дин председатель Закир Гьасанова. – Къе-пака чна никIерай къуьл кIватI хъувуна акьалтIарда. Гектардин бегьерлувили 22-23 центнер тешкилзава.
Гад кIватI хъувунин карда тежрибалу комбайнер Ниби Самедова чIугвазвай зегьмет тариф авуниз лайихлу я. Куьгьнеди ятIани, ада СПК-дин комбайн гьамиша кIвалахдай къайдада аваз хуьзва.
Комбайнидикай хкатай техил «ГАЗ-53» маркадин машиндал кIвалахзавай шофер Зиби Самедова, энгел тавуна, хармандал хутахзава.
Гад агудай никIерай гуьгъуьналлаз пресс-подборщик галай тракторди самар туьквера кьазва. Закир Гьасанова чаз лагьайвал, никIерай 3000-далай виниз туьквер хьун гуьзлемишзава.
Къуьл ва самар хуьруьнвийриз маса гузва. Муьштериярни авазва.
Закир Гьасанова алава хъувурвал, гад агудна акьалтIарнамазди, никIера цанар цунив эгечIда. Къведай йисан бегьер патал ина цIинин зулухъай 50 гектарда техилдин тумар цада.
Къазиагьмед Къазиагьмедовахъ ва Къазиагьмед Абумислимовахъ галаз чун «АлиЯк» ООО-дин гад агудзавай никIеризни фена. Карханадихъ зулун ва гатфарин магьсулар цанвай 172 гектар никIер ава. Гад агудунал Хасавюртдай арендада къачуна куьмекдиз гъанвай цIийи жуьредин «Вестер-410» комбайн машгъул тир. Гуьгъуьналлаз махсус агрегатди (пресс-подборщикди) самар туьквера кьазва.
Чаз акурвал, ООО-да къуьл хкидай ва самар патал алай аямдин истемишунриз жаваб гузвай еке ва кьакьан харман, кьурар эцигнава.
Чаз лагьайвал, «АлиЯк» ООО-да гьар са гектардай 25-30 центнер техил кIватI хъийизва.
Районда гад кIватI хъувунин кIвалахар давам жезва. Квез къуватар хьурай, магьсулдарар!
Хазран Кьасумов
