Куь ихтиярар
Сагъламвал мягькемардай мумкинвилер
СВО-дин иштиракчийривай ва абурун хизанривай санаторийриз фидай путевкаяр МФЦ-дай гьавая къачуз жеда.
Дагъустандин МФЦ-дин кьилин идарадин пешекарри хабар гузвайвал, алай йисан эвел кьилелай республикада санаторийризни курортриз талукь 3 агъзурдав агакьна путевкаяр ганва. И кар кьилиз акъудун патал Россиядин яшайишдин фондунин регионда авай отделениди 110 миллион манатдилай артух такьатар рекье тунва. Асул фикир СВО-дин иштиракчийризни абурун хизанриз гузва.
Санаторийризни курортриз фидай путевкайрин гьакъиндай арзаяр неинки Соцфондунин муьштерийриз къуллугъдай чкайра, гьакIни Дагъустанда авай МФЦ-дин идарайрани вугуз жеда. Арзачидив паспорт, медицинадин талукь формадин справка хьун герек я.
Санаторийдин жуьре ва ана жедай йикъарин кьадар медицинадин жигьетдай гьалдиз килигайдалай кьулухъ нетижадал асаслу яз тайинарзава.
Сагъламвал неинки республикада, гьакIни Ставрополдин крайдин, Крымдин, Кабардино-Балкариядин ва Кеферпатан Осетиядин-Аланиядин курортрани мягькемариз жеда.
ИНН
ИНН налогар гузвайдаз талукь кьилдин нумра я. Ам агьалийриз герек жедай рекьер гзаф ава:
– налогрин учет патал;
– кIвалахал акъваздайла;
– налогрин вычет туькIуьрдайла;
– ИП ахъайдайла;
– жува-жув кардал машгъуларнавайвилин гьакъиндай регистрация ийидайла ва хейлин маса дуьшуьшра.
ИНН са сеферда тайинарзава ва ам яшамиш жезвай чка ва я фамилия дегишарай дуьшуьшра дегиш жезвач. 2026-йисалай ЕГРН-дай къачур выписка налогрин учетда эцигнавайвилин гьакъиндай тестикьарзавай документ яз гьисабзава. Чарчин выписка агьалийривай МФЦ-дин идарайрай къачуз жеда. И документ герекзавайди паспорт гваз фена кIанда. Вад йикъан къене туькIуьрзава. Им гьавая кьилиз акъудзавай къуллугърик акатзава.
ИНН авайбурувай ам ФНС-дин ва я Госкъуллугърин онлайн сервисдин куьмекдалди чириз жеда.
Налогрин бурж чирдай мумкинвал
Дагъустандин МФЦ-дин вири идарайра налогрин жигьетдай алай буржар чириз жезва. И кар кьилиз акъудун патал ватандашдив хьана кIанзавайди анжах паспорт я. МФЦ-дин пешекарди ФНС-дин органривай хабар кьада. И къуллугъни гьавая кьилиз акъудзавайбурук акатзава.
Бурж алатIа чирун авиляй важиблу я хьи, вахтунда налогар гуни гележегда артухан жермеяр акьалтуникай хуьда.
"Лезги газет"