Экуь къаматриз бахшна
И йикъара Махачкъалада, Советрин Союздин Игит Кьади Абакарован экуь къамат рикIел хкунин лишан яз, азаддаказ кьуршахар кьунай Вирироссиядин акъажунар кьиле фена. Жуьреба-жуьре регионрай тир жаванри заланвилин 10 категориядай гьасиррал чпин алакьунар къалурна. Чи ватанэгьлийрикай ана Осман Султанова (Каспийск, Къ. Къурамегьамедован тIварунихъ галай ФОК) 57 кг-дин заланвал авайбурун арада ва Рагьман Мелагьмедова (Махачкъала, СШОР-3) 125 кг-дин заланвал авайбурун арада къизилдин медалар къазанмишна.
***
24-октябрдиз СтIал Сулейманан райондин Курхуьрел, СССР-дин КМС Керим Кьасумован экуь къаматдиз бахшна, азаддаказ кьуршахар кьунай 2013-2016-йисара дидейриз хьанвай жаванрин арада гьар йисуз кьиле тухун хъсан адетдиз элкъвенвай акъажунар кьиле фена. Акъажунар ачухуниз талукьарнавай мярекатдал райадминистрациядин спортдин, туризмдин ва жегьилрин крарин рекьяй комитетдин директор Ч. Абдулмежидова, ИМЦ-дин кьилин пешекар Н. Аминова ва масабуру иштиракна.
Кьиблепатан Дагъустандин жуьреба-жуьре пипIерай тир
100-далай виниз жаванри гьасиррал чпин устадвал ва алакьунар къалурай бягьсер,
дугъриданни, итижлудаказ кьиле фена. Нетижада Дербентдин – 1, Белиж поселокдин
- 2 ва СтIал Сулейманан райондин командаяр 3-чкайриз лайихлу хьана.
Гъалибчийриз ва призерриз кубокар, медалар ва грамотаяр гана.
Рагнеда Рамалданова