Ракь ишлемиш тийизвай ва сварщикдин къуллугъ лазим текъвезвай хел фикирдиз гъун четин я. И пешедихъ авай игьтияж гьамиша екеди я. Гьа са вахтунда ам четин ва хаталу пешейрикни акатзава. Къенин чи суьгьбет сварщикдин пеше вичин уьмуьрдин рехъ яз хкянавай ва яргъал йисара гьакъисагъдаказ кIвалахзавай Балаугъланов Омар Балаугълановичакай я.
Ахцегь райондин Грарин хуьре 1954-йисуз дидедиз хьайи Омар алай вахтунда Каспийск шегьерда яшамиш жезва.
1966-йисуз хьайи залзалади адан диде-бубадин хизан Азербайжандиз куьч хьуниз мажбурна. Омара гьана юкьван школа акьалтIарна, гуьгъуьнлай Бакуда ГПТУ-да кIелна, сварщиквилин пеше къачуна. Советрин Армиядин жергейра къуллугъайдалай гуьгъуьниз ам вичин ватандиз хтана.
Зегьметдин рехъ Омара 1976-йисуз Каспийск шегьердин “Дагдизель” заводда сварщиквиле кIвалахунилай башламишна. Карханада ада яргъалди зегьмет чIугуна. Амма муракаббур тир 90-йисара, уьлкведин сиясат дегиш хьунихъ галаз сад хьиз, карханаяр, заводарни фабрикаяр усал, гьатта чкIидай гьалдиз атай вахтунда Омар Балаугълановичан виликни кIвалахдин чка дегишарунин месэла акъвазна. Гьа икI, 1997-йисалай къенин йикъалди ада Каспийскдин агьалийрин кIвалерив чимивал агакьарзавай карханадин — “КаспийТеплоСервис” ООО-да сварщик яз зегьмет чIугвазва. Пенсиядин яшда аватIани, кIвалах давамарзавай, каспийсквийрин яшайишдин къулайвал таъминаруник пай кутазвай тежрибалу сварщик Омар Балаугълановичаз юлдашрин, коллективдин арада гьуьрмет ава.
“Карханада кIвалахзавай йисара Омара вич гьам гьакъисагъ зегьметчи, коллективдин дестекрикай сад ва гьакIни хъсан инсан тирди тестикьарна. Руководстводи лагьай гьи кIвалах хьайитIани, ада “ваъ” талгьана, намусдивди кьилиз акъудда. Сварщикар яз карханадиз гьикьван инсанар къвез-хъфена, амма ада къенин йикъалди гьуьрметдивди вичин кIвалах кьиле тухузва ва амай юлдашризни вичелай чешне къалурзава”, — лугьузва кIвалахдин рекьяй юлдашдикай «КаспийТеплоСервис» ООО-дин участокдин начальник Руслан Шихкеримова.
“Карханадиз атай йисалай къенин йикъалди за ихьтин гьуьрметлу коллективдихъ галаз, гъил-гъиле кьуна, къуьн-къуьне туна, зегьмет чIугвазва. Заз жуван кIвалах ва захъ галаз санал зегьмет чIугвазвай юлдашар пара хуш я. Гьаниз килигна, са кьадар яшдив агакьнаватIани, заз кIвалахдилай элячIдай фикир авач, — лугьузва Омар Балаугълановича. — Икьван хъсан, гьуьрметлу коллектив арадал атун карханадин регьбер Тагьир Агьмедович Агьмедован гьунарлувал я. Заз ам масадан дердиникай хабар кьадай, жумартлу кас яз чида. Алаш-булаш хьанвай, муракабди тир и девирда ада вичин работникар руьгьдай ават тавун патал вири жуьредин алахъунар ийизва”.
Кьурагь райондин КIимихуьряй тир Гуьлжегьредихъ галаз кьисметар сад авуна, 1976-йисуз арадал атай Балаугълановрин хизанда 4 хвани са руш хьана.
Гьайиф хьи, са хва Фекрет 2002-йисуз Каспийскда Гъалибвилин юкъуз хьайи терактдин нетижада телеф хьана. А чIавуз адан 14 йис тир. Амай пуд хци — Гьуьрмета, Самира ва Кемрана — алай вахтунда Россиядин Армиядин жергейра аскервилин икьрардалди (контрактникар яз) къуллугъзава. Рушни вичин хизан галаз Каспийскда яшамиш жезва.
Аскеррин буба, рабочий пешедин сагьиб, тежрибалу сварщик, гьакъисагъ зегьметчи, жегьил несилар патал чешне — Омар Балаугълановичаз чна мад ва мад яргъал йисара кIубанвал хьун алхишзава.
Жасмина Саидова
