ТIебиатдин бедбахтвили Дагъустандиз­ ганвай зиянрай эвездин месэла уьлкве­­дин Президент Владимир Путинан­ гуьзчивилик ква. Идан гьакъиндай Да­гъус­тан Республикадин Кьил Сергей Мелико­ва вичин телеграм-каналда хабар гана.

«ГъвечIи Ватан – Россиядин къуват» фо­румдал рахадайла, государстводин регьберди бедбахтвилик акатай хизанар, абурун кIвалер ахтармишун ва вахтунда чкадал хкидай серенжемар гежел тевгьена кьабулун тапшурмишна.

Ада лагьайвал, сифте нубатда кIва­лериз талукь документар авачирбуруз куьмек гун лазим я. Президентди абур патал нормативдин ва къанундин рекьяй  месэла гьялдай къайдаяр  жагъурун, рес­публикадиз герек куьмек гун федеральный органрал тапшурмишна.

«Зунни тамамвилелди и кардин терефдар я ва чна гьа сифте йикъалай чи кIвалахни гьа икI тешкилнава. Владимир Владимировичаз сифте авур докладда за къейднай: гзаф агьалийрихъ чпин кIвалериз талукь документар авачир. Гьавиляй абурув государстводин патай тамам куьмекарни агакь тавун мумкин я. Ихьтин агьалийриз чна бюджетдик квачир чешмейрай куьмек гудайвал я.

Алай вахтунда чна, мулкар комплекс­нидаказ вилик тухунин къайдайрал амал авуналди, законсуз эцигунриз рехъ тагунин кIвалах тухузва. Лугьун лазим я хьи, алатай йисара шегьеррани районра кьилдин ксари худда кIвалер эцигна. Гьайиф хьи, гзафбуру абуруз талукь документар туькIуьрнач.

Президентди гьамиша хьиз, дуьз тапшуругъар гана ва и месэла чи гуьзчивиликни жеда. Вири дагъустанвийрин, агьалийрин патахъай къайгъу чIугвазвай Владимир Владимировичаз за рикIин сидкьидай сагърай лугьузва. Са шаклувални авач, лап вини дережадин куьмекар агакьзавай чна кIеве гьатнавай чи инсанар лап фад кIвалералди таъминар хъийи­да», — кхьенва Сергей Меликова.

Абад Азадов