Къайдадик хьун герек я
4-августдиз Махачкъалада РД-дин Гьукуматдин Председатель Мегьамед Рамазанован регьбервилик кваз Дагъустан яшайишдинни экономикадин жигьетдай вилик тухунин месэлайриз талукьарнавай Оперштабдин заседание кьиле фена.
«Лезги газетдиз» Гьукуматдин пресс-къуллугъди хабар гайивал, мярекатдин сергьятра аваз, гьукумдин ва чкадин самоуправленидин органар агьалийрилай къвезвай арзайриз килигзавай гьалар, РФ-дин Президентдин тапшуругърин сергьятра аваз, региондин мулкар капитализация авун артухарун патал кьабулзавай серенжемар, муниципалитетра коммунальный къуллугъар кьилиз акъуддай кьилдин идараяр арадал гъун, шегьерарни районар зирзибил гадардай контейнерралди бес кьадарда таъминарун веревирдна.
Заседанидал Мегьамед Рамазанова къейд авурвал, республикадин агьалийрилай къвезвай арзайриз вахтунда килигун гьукумдин органрин кIвалахдин менфятлувал алцумзавай уьлчмейрикай сад я. Премьер-министрди арзайриз гъиле-гъилди килигна жаваб гун, агьалийрихъ галаз хуьзвай алакъайрин ери хъсанарун, гьукумдин вири дережайра хивевай мажбурнамайрив жавабдарвилелди эгечIун тапшурмишна. Адан гафаралди, бязи идарайра и кIвалах лазим къайдада тешкилнавач.
«Агьалийрихъ галаз сих алакъада хьун гьукумдин органрин кIвалахдин хийирлувал къалурзавай делилрикай сад я. Жергедин инсандиз вичин месэла гьялунин жигьетдай жавабдарвал гьи ведомстводин хиве аватIа эсиллагь важиблу туш. Ада тайин нетижа вилив хуьзва. Гьавиляй арзайриз килигзавай вахт, алакъадин ери, жавабдарвал гьар са дережада къайдадик хьун герек я», – къейдна Гьукуматдин Председателди.
РД-дин Кьилин ва Гьукуматдин Администрациядин регьбер Махач Омарова хабар гайивал, ЦУР-дай агакьнавай делилрал асаслу яз, июлдин вацра дагъустанвийрилай 12 222 арза атана. Алатай йисан и вацрав гекъигайла, ихтилат физвай рекъем саки 17 процентдин артух хьанва. Абурукай 3014 – экверихъ 1671 – рекьерихъ, 792 цихъ галаз алакъалу месэлайриз талукь я.
Республикадин агьалийрик къалабулух кутазвай месэлаяр гьялун патал арзайрикай 3287 – гьукумдин органриз, 6590 – муниципалитетрин администрацийриз, 2345 коммунальный къуллугърин рекьяй кIвалахзавай карханайриз рекье туна.
Заседанидал Махач Омарова гьар са дагъустанвидивай, арада арачи авачиз, чпин дердийрикай республикадин регьбердиз хабар гуз жедайвал кардик кутунвай алакъадин чат-ботдиз июлдин вацра 1 818 арзаяр атанвайди малумарна. Алай вахтунда абурукай 1046 арзадиз талукь кIвалахар акьалтIарнава, амайбурузни килигзава. РикIел хкин, республикадин Кьилихъ галаз алакъа хуьдай чат-бот алай йисан 9-июлдилай кардик акатнава.
Оперштабдин заседанидал РД-дин эцигунрин, архитектурадин ва ЖКХ-дин министрдин везифаяр вахтуналди тамамарзавай Анвар Шамилова къейд авурвал, Дагъустандин 28 районда целди таъминарунин рекьяй ресурсралди таъминардай идараяр кардик кутунва. Идахъ галаз сад хьиз, республикадин 42 райондикай 28 районда коммунальный къуллугъриз талукь тарифар тестикьарнава. 14 районда и жигьетдай гьелелиг кIвалахар акьалтIарнавач.
Шегьеррикай рахайтIа, 10-кай 9 шегьерда ресурсоснабжающий идарадин везифаяр региондин сад тир операторди тамамарзава. Къизилюрт шегьерда и везифаяр гьукуматдин ваъ, кьилдин касдин карханади тамамарун патал герек тир чарар-цIарар гьазурзава. Къенин юкъуз авай делилралди, 10-дакай 7 шегьерда ва 672-дакай 298 хуьре целди таъминардай ва канализацийриз талукь схемаяр арадал гъана куьтягьнава. И жигьетдай бязи муниципалитетар гуьгъуьна амукьун бес кьадар пулдин такьатар тахьунихъ галаз алакъалу я.
Заседанидал, Россиядин Президентдин тапшуругърин сергьятра аваз, Дагъустандин мулкар капитализация авуникай (чилин участокрин ва анра авай капитальный эцигунрин объектрин умуми къимет акъудун) рахадайла, премьер-министрди къейд авурвал, им кар алай месэлайрикай сад я.
И жигьетдай кьиле тухузвай кIвалахдиз талукь доклад РД-дин Гьукуматдин Председателдин заместителдин везифаяр вахтуналди тамамарзавай Заур Эминова авуна.
Заседанидин кIвалахдикай гегьеншдиз РД-дин Гьукуматдин сайтдай кIелиз жеда.
Агьмед Магьмудов