23-25-сентябрдиз Дагъустандин дагълух са жерге районра къати марфар къвана. Еке хасаратвилер хьанвайбурун арада Тлярата, ЦIумада ва ЦIунти районра ава. “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гайивал, марфар къуникди и районрин мулкарилай авахьзавай вацIара цин дережа хкаж хьана, нетижада рекьер къайдадикай хкатна, эквер хкахьна, чкадин агьалийрин майишатриз еке зиянар хьана.
ЧIуру нетижаяр арадай акъудун патал РД-дин Кьилин везифаяр вахтуналди тамамарзавай Сергей Меликован буйругъдалди махсус штаб кардик кутуна. Зарар хьанвай районриз МЧС-дин къуллугъчияр, республикадин са жерге министерствойрин векилар фена, чкадал гьаларихъ галаз таниш хьана.
27-сентябрдиз Махачкъалада вице-премьер Абдулмуслим Абдулмуслимован регьбервилик кваз кьиле фейи заседанидал тIвар кьунвай районра авай гьалар веревирдна.
А.Абдулмуслимова къейд авурвал, дагъдин вацIариз селлер атунин нетижада са жерге районрин хуьрер цик акатунин хаталувал арадал атанва. Ахьтинбурун арада Къизилюрт райондик акатзавай Кироваул, Нечаевка, Султанянгиюрт, Агъа Чирюрт ва Зубутли-Миатли хуьрер ава. Яд акьалтунин вилик пад кьун патал районда герек тир вири серенжемар кьабулнава.
Заседанидал республикадин тIебиатдин ресурсрин ва экологиядин министрдин заместитель Марина Алихановади хабар гайивал, республикадин мулкарилай авахьзавай вацIара авай цин дережа гуьзчивилик кутун патал махсус 4 бригада арадал гъанва. Абуру чкайрал кIвалахар кьиле тухузва.
Энергетикадин объектрал арадал атанвай гьаларикай Дагъустандин энергетикадин ва ЖКХ-дин министр Ризван Мурадова суьгьбетна. Адан гафарай малум хьайивал, ЦIунти, Тлярата, Шамил районра ва Бежтадин участокда къати марфар къуникди эквер хкахьнавай. 28-сентябрдиз вири районра эквер хгунин кIвалахар акьалтIарна.
«Лезги газет»
