Камалдин Агьмедоваз 80-йис мубаракрай
Камалдин Агьмедов – Россиядин писателрин союздиз кьабулай эвелимжи агъулви. Асиррин къене агъулрин литература маса чIаларал (араб, туьрк) арадал къвезвай.
Алатай асирдин эхирра хайи чIалал теснифиз эгечIай ва пешекар литератордин дережадиз акъатай чи сифтегьан шаиррикай сад Камалдин Агьмедов хьана. Гила ам агъул, лезги ва урус чIаларал кхьенвай эсеррин цIудалай виниз кIватIалрин автор я. Дагъустанда ам фадлай ва хъсандиз чида. Адан яратмишунриз лайихлу къимет Агьмедхан Абу-Бакара, Мегьамед-Загьид Аминова, Ибрагьим Гьуьсейнова, Камал Абукова, Азиз Алема ганай. Вичин 80 йис Камалдин Агьмедова яратмишунин къуват зайиф тахьана къаршиламишзава. Къуй адахъ чандин сагъламвал ва цIийи агалкьунар хьурай!
Шабан Мазанаев,
филологиядин илимрин доктор, профессор