Госдумади духтурриз ва фармацевтриз вузра ва колледжра медицинадин рекьяй образование арада мензил авай къайдада къачун къадагъа ийизвай закон кьабулнава. Амма федеральный образованидин стандартра и къайдадилай къерехдиз акъуднавай бязи кьетIенвилериз рехъ ганва.
2026-йисан 1-мартдилай образованидин программайра медицинадин рекьяй чирвилер къачузвайбур патал арада мензил аваз къачуз жедай чирвилерин кьадар ва къайда кхьена къалурда.
Депутатри, гьа гьисабдай яз Госдумадин Председатель Вячеслав Володина духтурар тежрибадалди гьазурунин важиблувал кьетIендаказ къейдна. Абуру гьисабзавайвал, тежриба галачиз гайи чирвилери азарлуяр патал хаталувилер арадал гъун мумкин я.
Госдумадин къарардин бинедаллаз, гьукуматди электронный технологийрин къайда ишлемишуналди гуз жедай чирвилерин жуьреяр, модулар, гьакIни абурун вини кьилин кьадар тайинаруниз талукь делилар депутатрин вилик 2025-йисан 1-сентябрдалди агакьарун лазим я.
«Лезги газет»
