Алай йисан эхирдалди Дагъустанда цIийи ругуд ктабхана кардик акатдайвал я. РД-дин медениятдин министерстводин пресс-къуллугъди хабар гузвайвал, модельный жуьредин ктабханаяр милли «Хизан» проектдин куьмекдалди эцигзава.
Проект кьилиз акъудун патал 69,7 миллион манат пулдин такьатар чара авунва. ЦIийи ктабханаяр ЦIумада, Дахадаеван, Къарабудахкент районра, Махачкъала ва Дагъустандин Огни шегьерра пайда жеда. Нетижада алай йисан эхирра Дагъустанда авай модельный жуьредин ктабханайрин кьадар 23-дав агакьда.
РД-дин культурадин министрдин везифаяр вахтуналди тамамарзавай Зарема Бутаевадин гафаралди, модельный жуьредин ктабханаяр арадал гъун Дагъустандин алай аямдин медениятдин инфраструктура вилик тухун лагьай чIал я. Ктабханаяр цIийи хъувуникди къулайвилер артух жезва. Нетижада ктабханаяр неинки са руьгьдин ем гузвай, гьакIни жуьреба-жуьре чIехи мярекатар тешкилзавай маканриз элкъвезва.
«Лезги газет»
