Чи газетдин умудлу даяхрикай сад тир педагогикадин илимрин кандидат, гзаф къени крариз руьгьдин деринрай къаюмвалзавай меценат, мецелай датIана, “Добрым утром!” лугьуз, хуш хъуьруьнрин келимаяр къведай жумарт хва - ичинви  Исламудин  Гьуьсейнован и йикъара 80 йис тамам хьанва.

1938-йисан мишекъат хъуьтIуьн юкъуз ЯркIи магьалдин къадим хуьрерикай сад тир Ичина дидедиз хьайи адаз, гьа чIаван гзаф  аялриз хьиз, кашар­ни, мекьерни, магьрумвилерни, зегьметарни тIимил акунач. Сифте хуьруьн мектебда, ахпа Кьасумхуьрел интернатда, гуьгъуьнлай  Дербентдин педучилищеда (гила - педколледж) чирвилер къачур жегьилдикай, хтана, гьа вичин хуьре, иллаки аялризни жегьилриз, истеклу муаллим, тербиячи, тешкилатчи, насигьатчи хьана. Са мисал гъунни бес я: Исламудин муаллимдивай тарс ва тербия къачур Да­гъус­тандин халкьдин писатель, РД-дин искусствойрин лайихлу деятель Абдуселим Исмаиловани РД-дин культурадин лайихлу работник, яргъал йисара “Лезги газетдин” хсуси корреспондент хьайи Шагьабудин Шабатова чпин муаллимдал рикIивай дамахзава.

Муаллим вич лагьайтIа, и ученикрин агалкьунрал дериндай шад я. Мумкин я, руьгьдай вич аялрин дуст, муаллим-тербиячи тирвиляй, Исламудин Гьуьсейнов гилани аял хьиз хъуьреда, вилиз акур куьлуь хъсанвилини ам шадарда.

Исламудин муаллимдихъ галаз санал кIелай илимрин доктор, профессор, цицIигъви  Салигь Муслимова чпин аялвилерикай, етимвилерикай “ЦицIигъ - наме” кьил гана кхьенвай ктабда Исламу­дин муаллимдизни хейлин чка ганва, чеб мектебрин­ аялар галаз хуьрерин стадионрал футбол къугъвай­вал, сиягьатриз санал фейивал, Дербентда кIел­дайла Лезги театрдиз мукьва хьайивал рикIел хканва.

Исламудин муаллим лезги искусстводал, илла­ки манидални театрдал кIевелай ашукь я. Заз чидайвал, аданни РФ-дин лайихлу артист, драматург Эседуллагь Наврузбегован арада халисан стхавилин алакъаяр авай. Исламудин муаллимди иштирак тавур, вичин саягъда куьмек тагай са тама­шани я Каспийскда, я Махачкъалада хьанач же­ди!..

Исламудин Гьуьсейнов лезги шииратдални гьакьван ашукь, адаз майилвалзавай ксарикай сад я. Ада Алибег Фатахован, Ибрагьим Гьуьсейнован, Абдуселим Исмаилован, СтIал Мислиматан, Абдулбари Магьмудован, Пакизат Фатуллаевадин, Саиратан, Гьаживерди Уьзденован, масабурун яратмишунрикай кхьей макъалаяр чи газетда ва “Самур” журналда чапна. Исламудин Гьуьсейноваз хайи чIални дериндай чида. Гьавиляй ада лезги чIал чирунин, хуьнин, виликди тухунин месэлайрай кхьей макъалайрини, дериндай анализ ганвайбур яз, чи газетда ва журналра чка кьуна.

Исламудин муаллимди гуржийрин классик Шота Руставелидин цIарар рикIел хкида:

С человеком точно так же

Поступает мир земной:

То обрадует лучами,

То обрушится грозой...

Инсандивни гьа и саягъ

ЭгечIзава тIебиат:

Гагь ви кьилел ракъурда рагъ,

Гагь - тIурфанрин мусибат...

( Таржума - М.Алидин )

И кьисмет чи дустунизни хас я.

Ам тIурфанрай датIана гъалибчи яз экъечIна! Гилани рекье ава…

Къе чна адаз рикIин садкьидай агакьнавай дережа - уьмуьрдин 80 йис мубаракзава.

Мубаракрай юбилей,

Эй гьуьрметлу Ичинви!

Дустар галаз, хуш хъуьрез,

Цава хьурай гичин ви!..

Мердали Жалилов