19-июлдиз Махачкъалада РД-дин Гьукуматдин Председатель Абдулмуслим Абдулмуслимова Дагъустанда проектар кьилиз акъудзавай инвесторриз государстводин патай куьмек гун патал махсус конкурс тухузвай комиссиядин заседание кьиле тухвана.

“Лезги газетдиз” РД-дин Гьукуматдин пресс-къуллугъди хабар гайивал, мярекатдин иштиракчийри республикада кьилиз акъуд­завай пуд проектдиз кар алайбурун (приоритетный) дережа гунин месэлани вер­евирдна. И проектрин арада агъадихъ галайбур ава: “Дербентда чехирар хкуддай компания эцигун” (теклифнавайди — Дербентдин чехирар хкуддай компания), “Дагъустан Республикада ичин, шуьмягърин багълар кутун ва майваяр хуьдай чка арадал гъун” (теклифнавайди — “Полоса” ООО), “Индустриядин эцигунрин “Каспий” комплекс арадал гъун” (теклифнавайди — “Капитал Инвест-Пром” ООО).

А.Абдулмуслимова хабар гайивал, “Капитал Инвест-Пром” ва “Полоса”  ООО-рин инвестицийрин проектриз талукь документар ла­зим къурулушралди таъминарунин рекьяй куьмек гун патал РФ-дин экономикадин ре­кьяй­ вилик финин министерстводиз рекье тунва.

Къейд ийин хьи, кар алайбурун дережа авай вири проектар эменнидилай гузвай налогрикай азадда. Идалай гъейри, абур патал къазанжидилай гузвай налогрин кьадарни 4 процентдин тIимиларда.

Агьмед Магьмудов