Фад кьилиз акъудзава

Хизандин цIийиз кардик кутунвай выплатадин­ гьакъиндай къарар диде-бубайри а кар патал тайи­нарнавай муддатдилай 2,5 сеферда йигиндиз къачузва. Идакай «Соцфонд. Контекст» телеграм-ка­налди хабар гузва.

Къейдзавайвал, 1-июндилай гатIуннавай цIийи серенжемдин нетижада кIвалахзавай диде-бу­бай­рин арзайриз килигунин кIвалах графикдилай виликамаз кьиле физва. Кардик квай къайдайралди, арзадиз килигун патал кIвалахдай 10 югъ чара­ ­ийизва.

Амма алай вахтунда арзадиз килигунин юкьван гьисабдин муддат кIвалахдин кьуд йикъакай ибарат я, яни тайинарнавай вахтунилай 2,5 сеферда тади гьалда.

СФР-дин телеграм-каналди, махсус мярекатдал раиж авур къейдерал асаслу яз хабар гузвайвал, хизандин выплата къачун патал гьар юкъуз идарадиз 134,5 агъзур кьван арзаяр къвезва.

Гьа са вахтунда РФ-дин зегьметдинни яша­йишдин рекьяй хуьдай министерстводин сайтда­,  анин кьил Антон Котякован гафарал­ асаслу яз раижзавайвал, арзаяр кьабулиз эге­чIай­далай инихъ 360 агъзурдалай гзаф диде-бу­байри вичикай ихтилат физвай пулдин такьатар къачунва.

А. Котякова къейдзавайвал, алай вахтунда Россиядин Яшайишдин фондуниз 1,8 миллиондилай гзаф арзаяр атанва. Выплатаяр 850 агъзурдалай гзаф аялриз тербия гузвай гьеле 363,7 агъзур агьалидиз тайинарнава.

РикIел хкин, виликдай и ведомстводин телег­рам-каналди раижайвал, ихьтин такьатар чпихъ кьвед ва адалай артух аялар авай диде-бубайриз гузва, эгер 2025-йисуз хизанда гьар са касдал ацалтзавай юкьван гьисабдин къазанжи регионда тайинарнавай 1,5 ПМ-дилай (прожиточный минимум) тIимил яз, эменнини эцигнавай критерийрихъ галаз кьазваз хьайитIа.

Рекьер цIийи хъийизва

Алай йисуз «Уьмуьр патал инфраструктура»­ милли проектдин сергьятра аваз, медицинадин идарайрал физвай рекьерин 500-далай гзаф учас­токар цIийи хъувун пландик кутунва. Идакай, вице-премьер Марат Хуснуллинан гафарал асаслу яз, РФ-дин Гьукуматдин сайтда хабар гузва.

Кьилди къачуртIа, ада раижзавайвал, вичикай винидихъ ихтилат физвай проектдин сергьятра аваз, региондин, чкадин рекьерин сетдин 524 участокдал махсус кIвалахар кьиле тухун пландик кутунва. Ихтилат областрин, шегьеррин поликлиникайрал, медицинадин еке центрайрал, чIехи тушир ФАП-рал физвай рекьерикай я. Адан гафаралди, санлай къачурла, ихьтин объектрин мензил 2,6 агъзур километрдилай гзаф жеда.

Гьа са вахтунда транспортдин министр Андрей Никитина къейдзавайвал, 2019-йисалай 2024-йисалди, «Хатасуз ва ерилу рекьер» милли проект­дин­ сергьятра аваз, азарханайрал, поликлиникайрал ва здравоохраненидин маса идарайрал фин таъминарзавай рекьерин 3,1 агъзур объект цIийи хъувунва. 2025-йисуз лагьайтIа, и кIвалах «Уьмуьр­ патал инфраструктура» милли проектдин сергьятра­­­ аваз давам хьана – а чIавуз ихьтин 530 участок цIийи хъувуна. Раижзавайвал, кIвалахар гьам чIехи шегьеррин сергьятра, гьамни агьалияр яшамиш жезвай чIехи тушир чкайра кьиле тухузва. Кьилди къа­чуртIа, ада къейдзавайвал, медицинадин идарайрив агакьдайвал хьун – им агьалийрин уьмуьрдин еридиз таъсирзавай метлеблу делилрикай сад я.

Федеральный рекьерин агентстводин кьил Роман Новикова раижзавайвал, поликлиникайрал, азарханайрал ва я ФАП-рал фидай рекьер вирибур патал къулайбур хьун лазим я. Чпин гьерекат агъузди тир (маломобильный) агьалияр ва сагъламвилин мумкинвилер сергьятламиш тир инсанар патал рекьин инфраструктура гъил агакьдайди хьуниз кьетIен фикир гузва.

Артух хьанва

2019-йисалай инихъ Россияда гзаф аялар авай хизанрин кьадар 1,5 сеферда артух хьанва. Идакай, вице-премьер Т. Голиковадин гафарал асаслу яз, РФ-дин Гьукуматдин сайтда раижзава.

Къейдзавайвал, уьлкведа саки гзаф аялар авай 2,9 миллион хизан ава. Санлай къачурла, абу­ра тахминан 9,5 миллион аялдиз тербия гузвай.

Гьазурайди – Муса  Агьмедов