Кьегьалар вирибуруз чир хьурай

21-июндин экуьнахъ фад, чпин уьмуьрни хаталувилик акатунихъай кичIе тахьана, Докъузпара райондин Къурушрин хуьряй тир Нариман Жалилова, Ариф Сеферова, Али Рустамова ва маса жегьилри Шалбуздагъдин инсандивай саки физ тежедай чкада акIанвай Дербентдин агьали, полициядин капитан бедбахтвиликай хкудна.

Къутармишайбурун гафаралди, МЧС-дин векилар чкадив агакьдалди вил алаз акъваз тавуна, тади гьалда куьмек тIалабзавайдан гьарайдиз фена кIанзавай. Дербентдин агьали дагъдин четин чкада амукьайдакай хуьруьнвийриз 20-июндин нянрихъ хабар хьана. ИкI, винидихъ тIварар кьунвай къурушвияр, герек затIарни кьуна, цифедизни нянин вахтуниз килиг тавуна, кIеве гьатнавайдаз куьмек гун патал рекье гьатна. Саки 17 сятдин вахтунда викIегьвилелди алахъунар авунин нетижада инсан къутармишна.

Къейд ийиз кIанзава, кьакьан дагъларни четин шартIар муьтIуьгъарнавай къурушвийри чпин мулкарани дагълара кIевера гьатай инсанриз идалай виликни куьмекар гайиди я. Инсандин уьмуьр къутармишун баркалла гъидай кьегьалвал я.

Чи фикирдалди, талукь тир гьукумдин органри жуьрэтлувал къалурай къурушвийриз шабагьар гун герек я.

К.Ферзалиев