Илимдин рекье
21-сентябрдиз Каспийск шегьерда «Перспективные квантовые материалы» лишандик кваз физикадин кар алай месэлайриз бахшнавай илимдин мектеб кардик акатна. Ам ачухунин мярекатда РД-дин Гьукуматдин Председатель Мегьамед Рамазанова, Москвадин физико-технический институтдин (МФТИ) ректор Дмитрий Ливанова ва масабуру иштиракна.
Вичин рахунра республикадин премьер-министрди къейд авурвал, регионда ихьтин мектеб кардик акатун Дагъустанда илим вилик финиз таъсирдай са вакъиа хьиз кьабулиз жеда. Идалай гъейри, и мектеб себеб яз, МФТИ-дихъ галаз амадагвилин алакъаяр мадни мягькем жеда.
Лагьана кIанда, мектебдин иштиракчийри квантовый материалрихъ галаз кIвалахда, абур дериндай ахтармишда. Пешекарри гьисабзавайвал, ихьтин материалри къведай девирдин технологийрин бине тешкилзава, гьавиляй и рекье илим вилик тухун санлай Россиядин технологический жигьетдай аслу туширвал (суверенитет) мягькемарунихъ галаз алакъалу я.
Гьелбетда, илимдин тайин са хел вилик тухун патал кар алакьдай, бажарагълу пешекарарни герек я. Дагъустанда и месэладиз кьетIен фикир гузва. Мегьамед Рамазанова къейд авурвал, Дагъустандихъ илимдин рекьяй еке мумкинвилер ава. «Къе регионда физикадинни математикадин 175 класс кардик ква, инженерный классар арадал гъизва, илимдихъ галаз алакъалу федеральный проектра иштиракзава. Ихьтин проектри жегьилриз пешекарвилин рекьяй вилик физ куьмекзава…», – лагьана Гьукуматдин Председателди.
Каспийскда кардик акатнавай илимдин мектеб гележегда Дагъларин уьлкведиз цIийи пешекарар, илимдин рекье цIийи агалкьунрал гъидай макандиз элкъведайдак умуд кутазва.
Агьмед Магьмудов