Хъсан крара тади къачун
ЦIийи конкурс
Мегьарамдхуьруьн райондин Гилийрин хуьруьн активист Абасов Ильяса, нубатдин сеферда кьил кутуналди, аялар патал цIийи конкурс малумарнава. ИкI, къведай йисан майдалди, вердишвилер къачуна, гьазур хьайи ва конкурсда кIвенкIвечи чкаяр кьур аялривай багьа пишкешрик умуд кутаз жеда. Акъажунра иштиракунин шартIарикай чаз и кар тешкилун вичин хивез къачунвай Абасов Ильяса ихтилатна.
Кьилди къачуртIа, Гилийрин хуьруьн мектебда 1-4-классра кIелзавай аялривай, 20 сеферда чене акъудиз алакьайтIа, йигиндаказ фидай жуьредин велосипед пишкеш яз къачуз жеда. Идалай тIимил сеферра чене акъудайбуруз спортдин са жерге маса алатар (ва я абурун пулдин эвез) гуда. 5-11-классра кIелзавай аялри виридалайни багьа пишкеш къачун патал 30 сеферда чене акъудун лазим я. Спортдин акъажунар кьиле тухунилай гъейри, конкурсдин нетижаяр кьадай вахт гиливийри хуьруьн сувар хьиз тешкилда. Конкурсдин нетижаяр алукьдай йисан 15-майдилай кьулухъ кьун фикирда кьунва.
«Акьалтзавай несил, аялар ва жегьилар дуьз, сагълам рекье аваз, ватанпересвилин руьгьдаллаз, хайи ерийрихъ галаз мягькемдаказ алакъа хуьналди тербияламишунин жигьетдай жавабдарвал гьар са касдин хиве ава. Ихьтин мярекатри-конкурсри и рекье куьмек гузва, абуру жегьилар сагъламвилин дестекрикай сад тир спортдал желбзава, беден мягькемарзава. И карда абур гьевесламишуни хъсан нетижайрал гъида», – гьисабзава ада.
Хъсан чешне виш гафунилай хъсан я, лугьузва бубайрин мисалда. Хийирлу крара сада масадалай алудиз тади ая, чирзава чаз мусурман динди. «Спортди вилик макьсадар эцигиз, абурухъ къастунал кIеви яз ялиз чирзава, жува-жуван гьиссерал гуьзчивалдай, жуван гьерекатриз къимет гудай алакьунар виликди тухуналди», – гьисабзава пешекарри.
Дугъриданни, Гилийрин хуьруьн активистри ва хъсан крара абуруз такьатралди куьмек гузвай спонсорри кьунвай рехъ баркаллуди я.
Жасмина Саидова