Муаллим, шаир Хкем Жамалдин кIелзавайбурун гзаф къатариз чида. Вичел чан аламаз адан «Дурнаяр», «Яру цуьквер», «Кхьихь, зи дуст», «Чилиз икрам» ктабар акъатна. И йикъара шаирдин 105 йис тамам хьунихъ галаз алакъалу яз Дагъустандин писателрин союздин секретарь Максим Алимова адан шииррин «Хкягъай эсерар» ктаб акъуднава.
ЦIийи ктаб «Зи хурудай акъатзава ялавар», «Заз чир хьана, вуч ятIа пис, хъсанди», «Къекъвезва зун вун жагъуриз», «Гьина авай адетар я?», «Зажженное любовью сердце» (и паюна шаирдин урус чIалаз элкъуьрнавай эсерар ганва) паярикай ибарат я. Ктабдин эхирда шаирдин ва адан багърийрин, дустарин шикиларни ганва.
Эсерар кIелайла, бажарагълу шаирдин яратмишунрай чаз ХХ асирда яшамиш хьайи инсанрин яшайиш, уьмуьр, дердияр, гьакI уьлкведин сиясатдин, жемиятдин къазанмишунар, девирдин нукьсанар аквазва. Халисан муаллим, устадлу тербиячи шаирвилив акьалтзавай несил ватанпересвилин, инсанпересвилин руьгьдаллаз тербияламишдай гужлу алатдив хьиз эгечIна. Шаирдин чIални кIелзавайдан рикIи кьабулдай ва гьейранвалдай гекъигунрив, къешенг метафорайрив, цIалцIам везинрив ацIанва.
Ктабда муаллимдихъ галаз санал кIвалахай юлдашрин, дустарин рикIел хкунар, «ЦIийи дуьнья», «Коммунист» газетдиз акъатай шаирдин макъалаярни ганва. Абура гьамиша гьахъвилин, дуьзвилин терефдал алай шаирди, муаллимди уьмуьрда къуллугърал алай бязи ксари рехъ гузвай нукьсанар, майишатра, карханайра, идарайра авай кимивилер дуьздал акъудзава.
Эсеррайни аквазвайвал, Хкем Жамалдин, къайгъудар ва секинсуз кас яз, хуьруьн ва райондин общественный кIвалахривай къерех хьанач. Ам хъсан тешкилатчи, агитатор, пропагандист тир. Адан шииррикай акьалтзавай несил тербияламишунин карда менфят къачуз жеда.
Абад Азадов
