И мукьвара Мегьарамдхуьруьн райондин Тагьирхуьруьн-Къазмайрин са шумуд кас агьалияр, «Лезги газетдин» редакциядивай куьмек кIанз, чахъ галаз гуьруьшдиз атана.
Абурун тIалабун ихьтинди тир. Хейлин йисар инлай вилик чкадин администрацияди, агьалийрин куьмекни галаз, хуьруьн кьилихъ галай ракьун рекьин къерехда пассажирар патал далдаламишнавай перрон эцигнай. Электропоезддал вил алаз акъвазнавай инсанриз им хъсан къулайвал хьанай. ЯтIани, объект са идарадинни балансдал алачирди, садни гелкъвен тийизвайди хьана.
Гьайиф хьи, алай йисуз анал бедбахтвилин дуьшуьш хьана: перрондин далдадин къавал акьахай са аял гужлу токди яна. Ам къутармишиз хьанач. Ракьун рекьин къуллугъди, вичин ихтияр авачиз, хатасузвал хуьнин къайдаяр, истемишунар кваз такьуна, агьалийри чпи чпиз эцигай перрондин далда чукIурна.
Инал са шумуд суал арадал къвезва. Ракьун рекьерин гьуьрметлу начальникар, и бедбахтвал жедалди квез и ихтияр авачиз эцигнавай объектдик хаталувал квайди вучиз акуначир? Пассажирар къачун патал электричка акъвазардай чка тайинардайла, ам вири патарихъай (гьа гьисабдай яз, эвелни-эвел перрондин хатасузвилин) кутугайди хьун вучиз фикирда кьунач? Вучиз агьалияр государстводин хсусият тир ракьун рекьерин объект — перрон са ихтиярни авачиз чпин такьатрихъ эцигдай чкадал гъана? Ихьтин кIвалахар ракьун рекьерин чпин везифайрик акатзава эхир!
Гъавурда акьазва — девир гьахьтинди тир. Жедай крар я. Гила чукIурнавайдан чкадал цIийи объект эцигун чарасуз я. Инсанри наразивилер къалурзава. И месэладин патахъай чна Тагьирхуьруьн-Къазмайрин муниципалитетдин кьил Марат Эмировавай хабар кьуна.
Перрон чукIурайвалди, гьеле инсанри арза-ферзе ийидалди, ада Кеферпатан Кавказдин ракьун рекьерин отделенидин кьиле авайбурун вилик кутугай чкадал пассажирриз къулай цIийи чка туькIуьрунин месэла эцигна. Аквазвайвал, чина адет хьанвайвал, месэла яргъал аватнава.
— Накь зун отделенидин кьиле авай ксарихъ галаз мад сеферда рахайди я, – лагьана чаз М.Эмирова. – Абуру перрондал, хатасузвилин къайдаяр хвена, пуд «будка» эцигда, хаталувал квай гужлу электролиния тухванвай чкада маса мумкинвилер авач лугьузва. Отделенидин кьилин инженер Мафрудин Тагьиров отпускдай хтайвалди кIвалахар башламишда.
Са жерге агьалийри наразивалзава: «ХъуьтIуьз марфарикайни живерикай, гатуз цIу хьиз кудай ракъиникай далда жедай, инсанриз къулай, туькIвей чка эциг тавуна, «будкаяр» вучтинбур я?! И кар патал чпин хсуси такьатар халкьдин хийирдиз харж ийиз гьазур хуьруьнвиярни ава. Анжах чил чара авуна, эцигунардай ихтияр я кIанзавайди».
Муькуь патахъай килигайла, «будкаяр» эцигун менфятлу рехъ хьиз аквазва. Вучиз лагьайтIа, Марат Эмирован гафарай, Тагьирхуьруьн-Къазмайрилай, Хтун-Къазмаярни кваз, таможнядин пунктунал кьван мензилда ракьун рекьин чIехи станция эцигунин, логистикадин чIехи центр туькIуьрунин къарар кьабулнава. ЧIехи станциядал, гьелбетда, вокзални хьун чарасуз я.
И карди чкадин агьалийрин уьмуьрда, шаксуз, са жерге дегишвилер твада, хъсан мажиб авай къуллугъар, кIвалахдай чкаяр арадал гъида. Хуьрерин дуланажагъдиз таъсир тахьана амукьдач. Хийирдиз хьуй …
Амма чаз адет хьанвай юзунралди, им къени пака кьилиз акъудна акьалтIардай месэла туш. Чкадин агьалийрин дердийрихъ, къулай уьмуьрдихъ, инсанрин ихтияррихъ чи бюрократиядин, капиталдин «рикI гьикьван гзаф кузватIа» аквазвай жемятдин активвал кIевелай истемишдай девир алукьзава. ТIебиатдин жавагьир, женнетдин хьтин са гуьзел пIипI тир Самурдин там хуьн патал кьиле фейи хци вакъиаяр, чкадин агьалийриз гайи кичIеяр, «яд тагайтIа, квез рехъни жедач» лагьай, республикадин регьбердиз кутуг тавур гафар чи рикIелай алатнавач эхир. Аллагьдиз шукур, Сергей Меликов атана. Самурдин там – Каспий гьуьлуьн къерех лезги халкьдин, Дагъустандин, вири Россиядин чIехи девлет тирди чизвай, ада месэла халкьдин, вири республикадин хийирдиз гьялна.
Абдулафис Исмаилов
