ЦIи 8-сентябрдиз чи уьлкведа сифте яз Россиядин халкьарин чIаларин югъ къейдна. Дагъустандин халкьдин шаир Расул Гьамзатован хайи йикъахъ галаз алакъалу яз ихьтин сувар кьиле тухунин къарар алатай йисуз РФ-дин Президент Владимир Путина кьабулна.

Алай вахтунда Дагъустандин чIалар хъсан гьалда ава лугьуз жедач, гьа са вахтунда абурун патахъай къайгъу чIугвадай серенжемар кьабулунин важиблувал гзафбуру гьиссзава.

10-сентябрдиз «Лезги газетдин» кьилин редактордин заместитель Куругъли Ферзалиев А.Тахо-Годидин тIварцIихъ галай ДНИИП-дин директор Альбина Аруховадихъ галаз гуьруьшмиш хьана ва абурун арада хайи чIалариз талукь месэладикай ихтилат фена.

– За вири дагъустанвийриз цIийи сувар мубаракзава, – тебрикдин гафарилай башламишна А. Аруховади вичин ихтилат.  – Хайи чIалар хуьнин рекье зегьмет чIугвазвай институтар, тешкилатар, кьилдин ксар аваз хьуни чак дамах кутазва.

Альбина Сефербеговнади къейд авурвал, мектебар патал акъуднавай ктабар (1-8-классрин) алатай йисара са шумудра цIийи кьилелай чап хъувуна. Алай вахтунда 9-классар патал хайи чIаларайни эдебиятрай ктабар чапдай акъудунин кIвалах гъиле ава.

Институтди неинки ктабар акъудунин, гьакI муаллимриз куьмекунин, абурун дережа хкажунин месэлайрани кIвалах давамарзава. Дагъустандин виликан регьбер Сергей Меликован тапшуругъдалди мектебдиз фидай яш тахьанвайбуруз хайи чIаларал чирвал гун патал махсус программаяр арадал гъизва. Дагъустандин халкьарин чIаларал диктантар кхьинин серенжемар, муаллимрин арада конкурсар, аялрин арада олимпиадаяр, илимдинни тежрибадин конференцияр институтди гьар йисуз кьиле тухузва.

ЦIи гъиле кьунвай важиблу крарикай сад «Яндекс таржумачи» арадал гъун я. Исятда РД-дин рекъемрин рекьяй вилик финин, информациядин ва печатдин министерстводин гуьзчивилик кваз Дагъустандин халкьарин 9 чIалал «Яндекс таржумачияр» арадал гъунин кIвалах кьиле физва. И карда ДНИИП-дин къуллугъчийри, мухбирри, муаллимри иштиракзава. ЦIинин йисан эхирда таржумачияр кардик акатун вилив хуьзва. 

К.Ферзалиев