Ракъинин электростанция эцигда
Дагъустанда 2024-йисан сифте кьиляй ракъинин чIехи электростанция эцигун пландик кутунва.
«Дагъустандин экономика» телеграм-каналди хабар гузвайвал, кьилди къачуртIа, Дербент районда саки 6,5 миллиард манатдин къимет авай ракъинин электростанция 2025-йисуз эцигна акьалтIардайвал я.
ЦIийиз арадал гъизвай электростанциядин гужлувал 100 МВт-дикай ибарат жеда. Ам эцигуникди 25 агъзур кIвал энергиядалди таъмин хьун ва 30 касдиз датIана кIвалахдай чкаяр арадал атун вилив хуьзва. Инвестициядин и проект кьилиз акъудзавайди «Солар системс» компания я.
Вичикай ихтилат физвай объект эцигун патал, савдадин серенжемар галачиз, 305 гектардикай ибарат майдан чара ийида.
Къимет хкаж хьанва
Алатай ва цIинин йисарин ноябрь варцарин рекъемар гекъигайла, Дагъустанда якIун продукциядин къиметар юкьван гьисабдалди 10 процентдин хкаж хьанва.
Республикадин са жерге изданийрин делилралди, эгер алатай йисан ноябрдин вацра малдин якIун къимет юкьван гьисабдалди 481 манат тиртIа, 2023-йисуз и рекъем 510-520 манатдив агакьнава.
Дагъустандин промышленностдинни алишверишдин министерстводин малуматралди, са жерге делилар себеб яз, якIун продукциядин къиметар вири уьлкведа хкаж хьанва.
ИкI, юкьван гьисабдалди Урусатда адан къимет — 10 ва, кьилди къачуртIа, СКФО-да 11,3 процентдин артух хьанва.
Къулайвилер тешкилнава
И йикъара РД-дин зегьметдин ва яшайишдин рекьяй вилик финин министерствода, дяведин гьерекатар себеб яз, катуниз мажбур хьанвай Палестинадин агьалийриз куьмекар гунин месэлайриз талукьарнавай совещание кьиле фена. Идакай ведомстводин официальный сайтда хабар ганва.
Мярекатдин сергьятра аваз министр Мурад Къазиева къейд авурвал, алай вахтунда чпин ватандай катуниз мажбур хьанвай агьалияр вахтуналди яшамиш хьун патал республикада чара авунвай махсус пунктара кьабулнава. Абур яшайишдин рекьяй герек тир вири шартIаралди, недай суьрсетралди, чими парталралди таъминарнава. Министрдин гафаралди, и макьсадриз республикадин гьукуматдин игьтиятдин фондунай 8 миллион манат пул чара авунва.
Идалайни алава яз, катуниз мажбур хьанвай гьар са агьали патал яшайишдин паспортар гьазурнава, ана жуьреба-жуьре рекьерай абур муьгьтеж тир затIар тайинарнава.
Министерстводин сайтда къейдзавайвал, тIвар кьунвай паспортра къалурнавай игьтияжар «Мергьяматлувилин дустар» («Друзья милосердия») тIвар алай фондарин ассоциацияди чпин умуми къуватралди таъминарун теклифна.
Совещанидал гьакIни са жерге месэлайрихъ галаз санал Палестинадай атанвай агьалияр кIвалахдай чкайралди таъминаруниз талукь месэлани веревирдна.
Алава такьатар къачуда
2023-йисуз Дагъустанди федеральный бюджетдай хуьруьн мулкар вилик тухунин рекьяй кардик квай государстводин программа кьилиз акъудун патал алава яз саки 16 миллион манат къачуда. Идакай РД-дин хуьруьн майишатдин ва недай суьрсетдин министерстводин пресс-къуллугъди хабар гузва.
Чешмеди къейдзавайвал, уьлкведин 44 региондиз и макьсадриз пулдин такьатар чара авун патал кьабулнавай къарардал премьер-министр М.Мишустина къул чIугунва.
Документдал асаслу яз, вичикай ихтилат физвай программадин сергьятра аваз, Дагъустанда серенжемар кьиле тухуниз ахъайнавай пулдин такьатрин кьадар алай йисуз 35,7 миллион манатдилай 51,4 миллион манатдал кьван хкаж жеда.
Гьазурайди — Муса Агьмедов
