Хабарар. Куьрелди
Къутармишнава
2026-йисуз республикадин медицинадин вертолетдин куьмекдалди 200-далай гзаф инсанар къутармишнава. Идакай Дагъустандин здравоохраненидин министерстводин телеграм-каналди хабар гузва.
Кьилди къачуртIа, чешмеди къейдзавайвал, алай йисан анжах муьжуьд вацра 202 пациент, «гьавадин тади куьмекдалди» санай масаниз тухуналди къутармишиз алакьнава. Абурун арада гьам чIехи яшарин векилар, гьамни аялар ава.
Гьа са вахтунда раижзавайвал, къутармишнавайбурун кьадар йисалай-суз артух жезва. И жигьетдай рекъемар ихьтинбур я: 2024-йисуз – 291 кас, 2025-йисуз – 335 кас.
Кьадай гьалдиз
«Дагэнерго» филиалдин пешекарри 2026-йисан эвел кьилелай инихъ 35-110 кв. классдин къуватдин (напряжение) 189 подстанциядиз технический жигьетдай къуллугъ ва абур ремонт авунин кIвалахар кьиле тухванва. Идакай «РСК» карханадин телеграм-каналди хабар гузва.
Чешмеди гъизвай делилралди, энергообъектрин кьилин ва куьмекдин 6 450 тадарак нормативдихъ галаз кьадай гьалдиз гъанва. Гьа гьисабдай яз хъуьтIуьз сетдал лап пар акьалтдай муддатда кIвалахун патал Махачкъала шегьер электроэнергиядалди таъминарзавай 12 ЦП (центр питания) гьазурнава.
Дагъустандин мад 26 подстанциядал технический мярекатар давамарзава. Уьмуьрдиз кечирмишзавай кIвалахар «Дагэнерго» филиалдин энергообъектар 2026-йисуз ремонт авунин программадик квайбур я.
Алафар гьазурнава
Дагъустанда зур миллион тонн кьван алафар гьазурнава. Идакай Дагъустандин хуьруьн майишатдин ва недай суьрсетдин министерстводин телеграм-каналди хабар гузва.
ИкI, и ведомстводин делилралди, алай вахтунда гьазурнава:
векъи алафар – 1 477,4 агъузр тонндилай гзаф, абурукай:
– векьер – 1 376,3 агъзур тонн;
– самар – 91,3 агъзур тонн;
– сенаж – 9,8 агъзур тонн.
Миже квай алафар:
– силос – 5,1 агъзур тонн.
Чешмеди раижзавайвал, аграрийрин къайдадик квай кIвалах ва хъсан гьавадин шартIар себеб яз, республикадин чуьллера «къацу бегьер» кIватIун давам жезва. Дагъустандин малдарвилин майишатри хъуьтIуьн сезон хъсан алафралди таъмин яз гатIунун патал хуьруьн майишатдин зегьметчийри чпин вири къуватар эцигнава.
Давам жезва
Дагъустанда салан майваяр кIватI хъувун давам жезва. Идакай региондин хуьруьн майишатдин ва недай суьрсетдин министерстводин телеграм-каналди хабар гузва. ИкI, ачух накьвадин салан майваяр 24,7 агъзур гектардин майданрилай 795,8 агъзур тонн кIватI хъувунва. Юкьван бегьерлувал – гектардай 322,2 центнер.
Картуфар 11 агъзур гектардин майданрай 198,2 агъзур тонн кIватI хъувунва. Юкьван бегьерлувал гектардай 180,2 центнер. Бегьер кIватI хъувунин кIвалахар давам жезва.
Муддат тIимиларнава
Дидевилин капиталдин патахъай Дагъустанда арзайриз килигунин муддат кьуд йикъалди тIимиларнава. Идакай СФР-дин сайтди хабар гузва.
Къейдзавайвал, виликдай кардик квай къайдайралди сертификатдин иесидин арзадиз вад йикъан къене разивал гузвай. Алай йисуз фондунин пешекарри 99 процент арзайрин гьакъиндай тир къарар тайинарнавай муддатдилай фад кьабулзава.
Хабар гузвайвал, алатай йисуз килигунин муддат кьве сеферда тIимиларнай – цIуд йикъалай вад йикъалди. Гила мад са йикъан тIимилар хъувунва.
Дагъустанда Яшайишдин фондунин отделенидин управляющийдин везифаяр тамамарзавай А. Загьидовадин гафаралди, регионда яшайишдин къуллугъар рекъемринбур авун давамарзава. Дидевилин капитал къачудай сертификат алай вахтунда арза галачир къайдада туькIуьрзава – аял хьанмазди, ЗАГС-дай ганвай делилрин бинедаллаз. Диде-бубайрин патай арзаяр кхьин герек авач. Гьазур электронный документ госкъуллугърин порталда авай дидедин хсуси кабинетдиз мукьвал муддатра хквезва.
Гьа са вахтунда раижзавайвал, йисан эвел кьилелай инихъ Дагъустандин Яшайишдин фондунин отделениди яшайишдин кIвалерин шартIар хъсанарун патал дидевилин капитал ишлемишунин жигьетдай 10 агъзурдалай гзаф арзайриз разивал ганва.
Гьазурайди – Муса Агьмедов