Вучиз бензин авач?

Соцсетра чкIанвай и суалдиз РД-дин энергетикадин ва тарифрин минис­терстводи баян гана: республикада АИ-92 ва АИ-95 маркайрин бензин гьасилдай са заводни авач. ГьакIни регионда са карханадини СУГ (сжиженный углеводородный газ) гьасилзавач. Идакай и ведомстводин телеграм-каналди раижзава.

Чешмеди гьа са вахтунда кьилин делилар фикирдиз гъизва. Республикада 739 АЗС-ди (автозаправочные станции) кIвалахзава. Абур вири кьилдин карчийринбур я.

Дагъустанда бензин гьасилзавайбур авач. Кудай ва ягъламишдай затIар рес­публикади къецепатай къачузва ва ракьун рекьяй, гьакIни автомобилрин улакьралди агакьарзава.

Республика къецепатай гъизвай кудай ва ягъламишдай затIарилай тамамдиз аслу я. Чешмеди раижзавай къейде­рин гъавурда акьазвайвал, маса регион­ра авай заводри метягь агакьарунин мес­эла гежел вегьезва, я виниз тир къимет­рай маса гузва. Гьавиляй заправкайрини бязи сергьятвилер кардик кутазва, къиметар лагьайтIа, виниз акъатзава.

Министерстводи арадал атанвай гьаларин гьакъиндай датIана ахтармишунин серенжемар (мониторинг) кьиле тухузва. Республикада кудай ва ягъламишдай затIарин базар дурумлу авунин кардин винел кIвалахзава.

Гьа са вахтунда «Дагъустандин экономика» телеграм-каналди, республикадин энергетикадин ва тарифрин министерст­водал асаслу яз раижзавайвал, Дагъус­танда вацра 30 агъзур тонндив агакьна сжиженный газ, 20 агъзур тонн – 92-маркадин, 25 агъзур тонн 95-маркадин бензин, 5 агъзур тонн дизелда кудайди маса гузва.

Кудай ва ягъламишдай шейэрин базарда дурумлувал тахьуникди региондиз нафтIадин суьрсетдин кьадар, гьакъикъи игьтияждиз килигайла, тIимил къвезва.

Алафар гьазурзава

Дагъустанда саки 500 агъзур тонн алафар гьазурнава. Идакай РД-дин хуьруьн майишатдин ва недай суьрсетдин минис­терстводин телеграм-каналди хабар гузва­.

Гатфариз гзаф марфар къун себеб яз, алай йисуз Бабаюрт, Хасавюрт, Тарумовский ва Къизляр районрин майишатрин чIурара хъсандиз векь экъечIнава. Къенин йикъан делилралди, республикада гьеле 494,6 агъзур тонндилай гзаф векъи алаф гьазурнава. Гьа жергедай яз: векь – 486,3 агъзур тонн; сенаж – 8,3 агъзур тонн; силос – 4,4 агъзур тонн.

Малдарвал ерилу алафрин базадал­ди дурумлудаказ таъминарун – им и хел агалкьунралди вилик тухунин кар алай делил я. Республикадин чуьллера кIвалахар давам жезва.

(Шикил – РД-дин хуьруьн майишатдин ва недай суьрсетдин министерст­во­дин телеграм-каналдай).

Гзаф хьанва

Дагъустанда 2026-йисан эвел кьилелай инихъ газ маса гунин рекъемар, алатай йисан и муддатдив гекъигайла, 6 процентдин гзаф хьанва. Идакай «Дагъустан патал газ» телеграм-каналди хабар гузва.

Къейдзавайвал, хъсан патахъ тир дегишвилин ериш сифтени-сифте ам ишле­мишзавайбурун кьадар артух хьунихъ, газдин инфраструктура вилик финихъ ва гьавадин шартIарихъ галаз алакъалу я.

Сагъламвилин къайгъуда

РД-дин Гьукуматдин къарардалди Да­гъустанда «Шекердин диабетдихъ галаз женг» программа тестикьарнава. Идакай республикадин министррин кабинетдин телеграм-каналди хабар гузва.

Программадин метлеб шекердин диабет профилактика, диагностика ва сагъар­ хъувунин серенжемар кьиле тухун патал­ медицинадин куьмекдин ери ва тIем акакь­дайди авун, материальный ва технический база хъсанарун я.

Программадин везифайрик са жерге серенжемар акатзава:

1-типдин шекердин диабет авай аялар глюкоза ара датIана ахтармишдай (мониторинг) системайралди таъминарун;

клинический меслятар фикирда кьуна, шекердин диабет авайбурув тайин кьезилвилер аваз дарманар агакьарун;

Буйнакскдин ва Дербентдин ЦГБ-ра «эндокринология» профилдай са шумуд райондиз къуллугъдай центраяр ачухун;

МЭЦ-ар (межрайонный эндокрино­ло­­ги­ческий центр) тамамдиз тадарак­ла­мишунин серенжемар кьиле тухун­ (алатар маса къачун) ва икI мад.

Гьазурайди – Муса  Агьмедов