Дагъустанда, алатай гьафтедив гекъигайла, ОРВИ ва грипп акатнавай дуьшуьшрин кьадар 15 процентдин артух хьанва. Идакай Роспотребнадзордин РД-да авай Управленидин пресс-къуллугъди хабар гузва. Арадал атанвай гьаларихъ галаз алакъалу яз ва инфекциядин азарар акатзавайбурун кьадар артух тахьун патал республикада образованидин 26 идарада карантин малумарнава. Са гьафтедин къене аялрин 12 бахчани 14 мектеб агалнава.
Роспотребнадзордин Управленидин малуматда къейднавайвал, Бежта участокда, Буйнакск шегьерда, Гуниб, Ботлих ва Буйнакскдин районра ОРВИ-дик ва гриппдик начагъбур пара ава. Гьавиляй и муниципалитетра образованидин идараярни вахтуналди агалнава. Роспотребнадзордин Управлениди образованидин идарайра кьиле тухвай эхиримжи мониторингдин нетижайралди, азарлу хьанвай 3386 дуьшуьш винел акъуднава. Абурукай 60 процент гриппдик начагъбур я. ОРВИ-дик ва гриппдик начагъ тахьун патал духтурри гузвай меслятрал амал авунихъ еке метлеб ава, — хабар гузва Управленидин пресс-къуллугъди.
«Лезги газет»
