РД-дин туризмдин ва халкьдин художественный сеняткарвилерин министерстводин пресс-къуллугъди хабар гузвайвал, алатай йисан зулун рекъемрив гекъигайтIа, цIинин зулуз Дагъустандиз мугьман хьанвай туристрин кьадар 10-12 процентдин гзаф хьанва.
Республикадин туроператорри и кар тестикьарнава. Абурун гафаралди, сентябрь-ноябрь варцара, гьакъикъатдани, Дагъларин уьлкведин надир тIебиатдиз, тарихдин гуьмбетриз, къадим Дербент шегьердиз килигиз атайбурун кьадар артух хьана.
Къейд ийин хьи, 29-декабрдиз Махачкъаладин аэропортуна кьиле фейи къанунсуз гьерекатар себеб яз, республикадиз къвезвай туристрин кьадар тIимил хьунин къурхулувал арадал атанвай. Амма якъин хьайивал, и делилди мугьманрин кьадар гзаф хьуниз са жуьредани таъсирнач.
РикIел хкин, 2022-йисуз Дагъустандиз, санлай къачурла, 1,5 миллион турист мугьман хьана. Абурун арада виридалайни машгьур чкаяр Дербент шегьер, Сулакдин дерин кIам-дере ва Сарыкъум кIунтI я.
«Лезги газет»
