Махачкъалада авай «Россия – зи тарих»­ тарихдин паркунин майдандал Дагъустандин мектебра кӀелунра кьетӀен агалкьунар къазанмишнавай выпускникар къейдна. Мярекатда Дагъустандин Кьилин везифаяр вахтуналди тамамарзавай Федор Щукина, рес­публикадин Халкьдин Собранидин Предсе­датель Заур Аскендерова ва премьер-ми­нистр Мегьамед Рамазанова иштиракна.

«Куь агалкьунри Дагъустандихъ неинки са чи республикадин, гьакӀни вири уьлкведин гележегдин рехъ вилик тухуник пай кутадай жегьил несил авайдан гьакъиндай шагьидвалзава. Чаз куьне, виниз тир дережадин образование, пешедин рекьяй тежриба ва чирвилер къачурдалай кьулухъ жуван гележег хайи Дагъустандихъ галаз алакъа­лу авунайтIа кIандай, гьикI лагьайтIа, рес­публикадихъ куь бажарагъдин, чирвилерин, цIийи теклифрин, энергиядин игьтияж ава. Чна квез масанриз фимир лугьузвач, чна лугьузвайди кIвализ хъша я – образование, чирвилер, тежриба къачурдалай кьулухъ», – къейдна региондин регьберди.
Са шумуд имтигьан 100 баллдалди вахкай аялар Ф. Щукина кьилди къейдна.

«Заз инал санлай пуд предметдай 100 баллдин агалкьунар хьанвай чи чемпионка Гуьльмира Халифатова кьетIендаказ къейд ийиз кIанзава. Тамам рекорд тир ихьтин дуьшуьш чи республикадин тарихда сад лагьайди я. Аферин! Пудайни 100 балл къазанми­шун дуьшуьшдин кар жедайди туш. Ихьтин­ нетижадихъ неинки аялдин къастунал кIевивал, гьакIни муаллимрин зурба зегьмет, диде-бу­бадин патай еке куьмек гала. Кьве предметдай гьардай 100 балл гьакI Карина Зираровади, Саида Мегьамедовади ва Гьамид Ибрагьимова къазанмишнава. За и агалкьунрай неинки аялар, гьакI абурун муаллимар, дуьзгуьн тербия ганвай диде-бубаярни рикIин сидкьидай тебрикзава», – лагьана ада.

Федор Щукина ЕГЭ-дай кьве ва мадни гзаф предметрай 100 балл къачур выпускникрив, гьакӀни Вирироссиядин олимпиадада гъалиб хьайибурув 100 агъзур манатдин сертификатар вахкана. РикӀел хкин, алай йисуз Дагъустанда ЕГЭ-дин имтигьанра 100 балл къазанмишай 52 выпускник ава. Мектеб­ра кIелзавай кьве аял лагьайтIа, уьлкведин мулкунал виридалайни машгьур конкурс яз гьисабзавай Вирироссиядин олимпиададин шабагьриз лайихлу хьанва. Дагъустандин тарихда сифте сеферда яз санлай 300 балл къазанмишнавай Гуьльмира Халифатовадиз 300 агъзур манатдин сертификат гана.

Мярекат кьиле физвай чӀавуз Федор Щукина кадрийрин «Дагъустандин команда»­ цӀийи программа кардик кутазвайдакайни­ виликамаз хабар гана. «Им гьакъикъи мес­элаяр гьялиз, чпин Ватанда агьалийрин ­уьмуьр дегишариз гьазурбур патал проект я», – къейдна ада.

Заур Аскендерова ЕГЭ-дин са имтигьандай 100 балл къазанмишай аялриз шабагьар гана. «Винизбур тир и агалкьунрин кьулухъ зурба зегьмет, чалишмишвал, гьелбетда, чирвилерал рикӀ хьун гала. Куь вилик уьлкведин лап хъсан университетрин ра­кӀарар ачух я. Квекай гьарда жуван вилик виниз тир макьсадар, дережаяр эцигна­ва. Зун инанмиш я, куьне, виридалайни хъсанбур хьунихъ ялиз, кьунвай рехъ агалкьунралди давамарда. ГьакIни заз муаллимриз, тербиячийриз, насигьатчийриз ва диде-бубайриз сагърай лугьуз кӀанзава – куь зегьметдал чна, вири республикади дамахзава», – лагьана ада.

Кьве ва адалай виниз предметрай 95-далай 99-дал кьван баллар къачур выпускникрив сертификатар Дагъустандин премьер-министр Мегьамед Рамазанова вахкана. Санлай къачурла, мярекатдал 90 жегьилдиз шабагьар гана. Къейд ийин, алатай йисуз республикада 100 балл къазанмишай аялрин кьадар 33-даз барабар тир.

Саида Мурадова