Зулун и йикъари хуьруьн майишатдин карханайрин, лежбервилинни фермервилин майишатрин ва арендаторрин къайгъуяр артухарнава, абуру багъларай, саларай, уьзуьмлухрай агакьнавай бегьер кIватI хъийизва.
СтIал Сулейманан райондин хуьруьн майишатдин ва суьрсетдин управленидин начальник Къазиагьмед Къазиагьмедовахъ ва адан заместитель Къазиагьмед Абумислимовахъ галаз чун и йикъара ципицIар кIватI хъийизвай са шумуд майишатдиз фена.
— Санлай къачурла, райондин карханайрихъ, КФХ-рихъ ва арендаторрихъ 1675 гектар уьзуьмлухар ава, — лугьузва Къ.Къазиагьмедова. – ЦипицIар кIватI хъувунин кIвалахар «Гуьлгери-вацI», «Дербент-Агро», «Зардиян» ООО-ра, Эминхуьряй тир Алимет Аллагьвердиеван лежбервилинни фермервилин майишатда ва маса карханайрани хъсан тешкиллувал ва еришар аваз кьиле физва. Анра гьар са гектардин бегьерлувили 100-110 центнер тешкилзава. Санлай къачурла, алай йисуз районда 16 000 тонндилай виниз ципицIар кIватI хъувун пландик кутунва.
Ингье чун «Гуьлгери-вацI» ООО-дин Герейханован хуьруьн кьилихъ галай участокда ава. Хъсан къайда, михьивал авай уьзуьмлухра тегьенгрик квай ципицIрин бегьер акурла, гуьгьуьлар шад жезва.
— Участокда агакьнавай ципицIрин бегьер – им чи бригададин рабочийрин, механизаторрин дурумлу зегьметдин гьунар я, — лугьузва бригадир Эмир Абдурагьимова. – Алай вахтунда ципицIар кIватI хъувунал 40-далай виниз рабочияр машгъул я. АтIай ципицIар, са кIусни энгел тавуна, Дербентдин чехирар хкуддай заводдиз рекье твазва.
Чаз малум хьайивал, «Гуьлгери-вацI» ООО-дихъ 525 гектар уьзуьмлухар ава. Идакай 380 гектар бегьердал атанвайбур я. Юкьван гьисабдалди карханада гьар са гектардай 110 центнер ципицIар кIватI хъийизва. Кьилди къачуртIа, Эмир Абдурагьимов кьиле авай бригададихъ 50 гектар уьзуьмлухар ава. Гьар са рабочийди йикъа 250-300 ведро ципицIар атIузва.
— Агакьнавай ципицIрин бегьер вахтунда ва пучвилер авачиз кIватI хъувун лап важиблу я, и кардал вири къуватарни желбнава, — лугьузва тежрибалу рабочий Раида Абдулаевади. – Гьар са рабочийди йикъа 3-4 агъзур манат пул къачузва, им гъвечIи къазанжи я лугьуз жедач. Карханада рабочияр кIвалахал гъиз-хутахунни тешкилнава, чаз кIвалахдай хъсан шартIарни яратмишнава.
Къазиагьмед Къазиагьмедова ихтилат авурвал, неинки районда, гьакI республикадани кIвенкIвечибурукай сад тир карханада мукьвал тир йисара мад 100 гектарда цIийи уьзуьмлухар кутадай фикир ава. Райондин экономикадин кьилинбурукай тир и хел мадни вилик тухуда.
«Гуьлгери-вацI» ООО-да ва райондин амай карханайра, майишатра ва арендадин участокра ципицIар кIватI хъувунин кIвалахар давам жезва.
Хазран Кьасумов
