Россельхознадзордин РД-да авай Управлениди Дагъустанда хуьруьн майишатдин тайинвал авай хейлин кьадар чилер зирзибилди кьунвай дуьшуьшар винел акъуднава. И кар себеб яз хьанвай зарарди 36,6 миллион манат тешкилзава.
Идарадин пресс-къуллугъди хабар гузвайвал, 2017-йисуз кьиле тухвай 489 рейддин серенжемрин нетижада хуьруьн майишатдин тайинвал авай чилер чиркинарнавай 14 дуьшуьш винел акъуднава.
Вири и дуьшуьшра никIериз ва чуьллериз яшайишда жезвай амукьаяр гадарнаваз хьана. Санлай къачурла 12,7 гектардин майдан кьунвай законсуздаказ арадал гъанвай зирзибилдин полигонар Дербент, Къизилюрт ва Хасавюрт районрин хуьруьн майишатдин чилерилай жагъанва.
Винел акъуднавай къайдасузвилериз талукь яз санлай къачурла 2 миллионни 58 агъзур манатдин жермеяр къалурнавай 251 протокол туькIуьрнава. Чилерин законодательство чIурай дуьшуьшар арадай акъудуниз талукь 135 теклиф (предписание) ганва.
Къайда чIурайбуруз, эгер Россельхознадзордин истемишунар гуьгьуьллудаказ кьилиз акъуд тавуртIа, экологиядиз ганвай зарар мажбуридаказ эвез хъувунин гьакъиндай чарар рекье тунва. Гуьзчивалдай органдин пешекарри суддиз арзаяр ракъурун патал документар гьазурзава.
«Лезги Газет»
