7-ноябрдиз Индиядин Нью-Делида са шумуд юкъуз давам хьайи армрест­лингдай дуьньядин 47 – ва пара-арм­рестлингдай 28-чемпионат акьалтIна. Виридуьньядин армрестлингдай федерациядин (WAF) къаюмвилик кваз Индиядин спортдин и жуьредай федерацияди (PAFI) тешкилай ана 60-далай виниз уьлквейрай тир 1700 спорт­сменди, гьа жергедай­ яз жаванри, ветеранри, бедендин мум­кин­ви­лер сергьятламиш хьанвайбуруни (пара-арм­рестлинг) чпин гъи­­лерин къуватар ах­тармишна.

Россиядин хкянавай командадиз, эхиримжи яргъал йисара сифте сефер яз, уьлкведин пайдах хкаждай мумкинвал хьана ва гъалиб хьайибурув шабагьар гимн ягъуналди вахкана. Санлай къачурла, 152 медаль къазанмишуналди, чи уьлкведин хкянавай команда 1-чкадиз лайихлу хьана. Туьркиядин хкянавай командади – 2, Индиядин командади 5-чкаяр кьуна.

Шадвилелди а кардикай мадни хабар гуз кIанзава хьи, уьлкведин хкянавай командадик кваз Дербент райондин Белиждин спортшколада чи ватанэгьли машгьур спортсмен, тренер Малик Тагьирбе­гован гъилик чпин устадвал хкажзавай Аким Гьамзатова жаванрин арада – кьве гъилинни, Рудин Селимханова 85 кг-дилай гзаф заланвал авайбурун арада эрчIи гъилин акъажунра къизилдин медалар къазанмишна.

Рагнеда Рамалданова