ЧIехи Гъалибвилин суварин вилик «Лезги газетдин» редакцияда рикIелай алат тийидай хьтин шад гуьруьш кьиле фена. Иниз республикада тIвар-ван авай хва, юрист ва тербиячи, Махачкъаладин ополченидин кьиле аваз 1999-йисан зулуз инай Ботлихдиз кьван фена, Хаттабанни Басаеван чапхунчи кIеретIриз кутугай ягъунар кьур полковник, гила генерал-майор Шамил Загьрабович Асланов ва адахъ галаз санал къурушви муаллимар, хъсан тешкилатчияр тир Несруллагь Сейфуллагьович Эскендеровни Аслан Агъаевич Эскендеров атанвай.
Мугьманрин рикIик са месэла квай: газетдин къуллугъчийри а четин макъамда кьиле тухвай викIегь кIвалах-информациядин майданда тешкилай агитациядинни пропагандадин, кIелзавайбур гъавурда тунин карда къалурай активвал рикIел хуьнин лишан яз, журналистрив чеб лайихлу хьайи шабагьар (наградаяр) вахкун. Абурун жергеда чи кьве яшлу журналист — РФ-дин ва РД-дин культурадин лайихлу работникар — Алаудин Гьамидов ва Мердали Жалилов (сад чараринни яшайишдин рекьяй, муькуьди литературадин отделрин редакторар) авай.
Шабагьар вахкайдалай кьулухъ лезги халкьдин баркаллу хва Шамил Асланова «Лезги газетдин» кIвалах еримлу хьунин рекье вичихъ авай теклифрикай, фикиррикай лагьана. Ада гьакIни «Лезги газетди» ватанпересвилин тематикадиз кьетIен фикир гузвайди, газет итижлу, адан ери хъсан жезвайди къейдна.
Лезги прессадин кьилин такьатдикай чпин фикирар Несруллагь Эскендеровани Аслан Эскендеровани раижна ва газетдихъ коллективдин мадни еке агалкьунар хьун алхишна.
«Лезги газетдин» редакциядин коллективди багьа мугьманриз кьил чIугунай сагърай лагьана ва чи чIехи юлдашриз лайихлу шабагьар ва алукьзавай суварни рикIин сидкьидай мубаракзава.
«Лезги газет»
