20-апрелдиз республикада математикадай Государстводин асул имтигьан (ОГЭ) тухунин технология ахтармишун (апробация) кьиле фена. Мярекат региональный ахтармишунрин графикдилай къерехдай яз, РД-дин образованидин ва илимдин министерстводин буйругъдин бинедаллаз кьиле тухвана.
И мярекат сифтедай тайинарнавай йикъалай (7-апрель) кьулухъ вегьин республикадин бязи муниципалитетра гьавадин татугай шартӀар арадал атунихъ галаз алакъалу я – и карди ахтармишун патал кьиле тухузвай имтигьандин къуллугъчияр ва иштиракчияр чкайрал (ППЖЭ) агакьарун четинарзавай.
Ахтармишун патал тухузвай имтигьанди мумкин тир четин месэлаяр дуьздал акъуддай, адан ери хъсанардай, гьакIни иштиракчияр ва тешкилатчияр гьакъикъи шартӀариз гьазурдай мумкинвал гузва.
Вердишвал къачун патал 9-классрин аялрин арада тухвай мярекатдал республикадин 52 ППЭ желбна. Имтигьандин нетижаяр ученикрив агакьарда.
РикIел хкин, ОГЭ-дин асул вахт 2026-йисан 2-июндилай 6-июлдалди давам жеда.
«Лезги газет»
