Алатай гьафтеда Махачкъалада, Урусрин драмтеатрдин ГъвечIи залда, меркездин 5-нумрадин лицейда кIелзавай аялри, Ватандин ЧIехи дяведа Гъалибвал къазанмишна 81 йис тамам хьуниз талукьарна, мергьяматлувилин концерт гана. Тамашачийрин рикIериз таъсир авур яргъал легьзеяр багъишна. Гьуьрметлу мугьманрин, аялрин мярекатдин тереф хвейибурун ва адаз еке къимет гайибурун арада Дагъустандин Халкьдин Собранидин депутат Елена Павлюченко, Махачкъаладин кьилин заместитель, образованидин управленидин начальник Шаганэ Баймурзаева, РД-дин юстициядин министерстводин патав тешкилнавай общественный советдин председатель Ислам Мегьамедов ва масабур авай. Зал сиве-сивди тамашачийрай ацIанвай.

Къейд авун лазим я хьи, 9-Майдин сувариз бахшна, аялри концерт гун кIелунин идарада фадлай авай хъсан адетрикай сад я. Амма Президентди Россиядин халкьарин садвилинди яз малумарнавай цIинин йисуз адан сергьятар мадни гегьеншарун кьетIна. Чир хьайивал, идахъ са себеб мадни авай, адакайни, концерт ачухдайла, лицейдин директор Патимат Османовади суьгьбетна.

– Чна Гъалибвилин сувариз нубатдин сеферда гьазурвал аквазвайла, тIебиатдин бедбахтвилиз элкъвей гужлу марфари республикада гзаф чкайра инсанар кIваливай-къавай авунвайди ашкара хьайила, концертдин сергьятар гегьеншарунин ва къазанмишай пулдин такьатар зиянар хьанвай ксариз куьмек яз гунин къарар кьабулна. Аялриз и кар акьван бегенмиш хьана хьи, абурук мадни гьевес акатна. Санлай къазанмишиз хьайи 120 агъзурни 500 манат чна мергьяматлувилин фондуниз рекье туна, – къейдна директорди.

Дугъриданни, 5-лицейда кIелзавай аялрикай — гьевескар гъвечIи артистрикай – ибарат тир хъсан коллектив ава. Абурун иштираквал аваз кьиле фейи хейлин мярекатра за идалай виликни са шумудра иштиракайди я. Аялри дяведикай лагьай манийри, дяведиз ва ислягь уьмуьрдиз талукьарна къалурай гъвечIи сегьнейри, тамамарай кьуьлери вилерал накъвар тагъай кас залда тунач, гьа са вахтунда шадвилин легьзеярни багъишна.

Эхирдай концертдин тешкилатчийри залдиз атай виридаз сагърай лагьана.

Ажий Абиева