Гьакъисагъ зегьметдиз – кутугай къимет
Росреестрдин Дагъустан Республикада авай Управленидин регьбер Арсен Пирмегьамедов Гьуьрметдин III дережадин ордендиз лайихлу хьанва. Гьукуматдин шабагь чи ватанэгьлидив РД-дин Кьилин везифаяр вахтуналди тамамарзавай Фёдор Щукина вахкана.
Дагъустандин Кьилин Указда къейднавайвал, Арсен Пирмегьамедоваз и шабагь юзуриз тежер мал-мулк гьисабдиз къачунин къурулуш вилик тухунин кардик чIехи пай кутунай, хейлин йисарин гьакъисагъ зегьметдай ва пешекарвиляй ганва.
Арсен Пирмегьамедов федеральный дережадин органдин республикада авай Управленидин кьиле аваз са шумуд йис я. И девирда адан регьбервилик кваз юзуриз тежер мал-мулк гьисабдиз къачунин, республикадин чилериз талукь месэлаяр къайдадик кутунин жигьетдай еке кIвалах кьиле тухванва. Адан алахъунар фикир тагана амукьнач: намуслу зегьметдиз кутугай къимет гана.
«Лезги газетдин» редакциядин коллективди Арсен Алифендиевичаз гьукуматдин шабагь – Гьуьрметдин III дережадин орден – рикIин сидкьидай мубаракзава ва адахъ кIвалахдин рекье мадни еке агалкьунар хьун алхишзава.
"Лезги газет"