Дагъустандин гьакимри СтIал Сулейманан райондин ЦIийи Мамрачрин хуьрел кьван газдин турба чIугунин кIвалах вахтунилай фад акьалтIарун пландик кутунва. Газдин сеть арадал гъуни тIебии газдалди хуьруьн 2 агъзурдалай гзаф агьалияр таъминардай мумкинвал гуда. Идакай РД-дин энергетикадин ва тарифрин министерстводин пресс-къуллугъди хабар гузва.
Хуьр газдалди таъминарун патал республикадин бюджетдай 45 миллион манат чара авунай. И кардал машгъул пудратдин карханадин векилри хабар гайивал, газдин объектар эцигунин кIвалахар сифтедай тайинарнавай вахтунилай фад — алай йисан эхирдалди акьалтIарун фикирда кьунва. Къейдзавайвал, хуьруьн къенепатан газдин турба ишлемишиз вахкуни неинки чкадин агьалийрин кIвалер, гьакIни яшайишдин важиблу объектар газдалди таъминардай мумкинвал гуда.
РикIел хкин, хуьруьз газ агакьарна кIанзавайдакай чкадин агьалиди алатай йисан апрелдиз РД-дин Кьил Сергей Меликовахъ галаз “дуьз линиядай” рахадайла лагьанай. Хуьруьн къенепатан газопровод эцигунин кIвалахар пландин бинедаллаз 2023-йисан февралдиз акьалтIарун лазим я.
«Лезги газет»
