Эцигунрин цIийи кархана
Дагъустан Республикадин Гьукуматдин Председатель Мегьамед Рамазанова 22-сентябрдиз эцигунрин «Каспийск» ООО «Ровна» комплекс шад гьалара ачухунин мярекатда иштиракна. Идакай «Лезги газетдиз» РД-дин Гьукуматдин пресс-къуллугъди хабар гана.
Мярекатда республикадин промышленностдин ва алишверишдин, экономикадинни мулкар вилик тухунин, чилерин ва эменнидин алакъайрин рекьяй, энергетикадин ва тарифрин, эцигунрин, архитектурадин ва ЖКХ-дин министерствойрин, Каспийск шегьердин администрациядин кьиле авайбуру иштиракна.
«Ровна» заводрин комплексди эцигунардай шейэр – киреж, газдинни бетондин блокар ва эцигунрин къаришма акъуддайвал я.
Шад мярекат ачухдайла, Мегьамед Рамазанова къейдна хьи, республикада пара метлеблу проект уьмуьрдиз кечирмишнава, промышленностдин инфраструктура арадал гъанва. Ида мулкар комплекснидаказ вилик тухудай проектар уьмуьрдиз кечирмишунин, школаяр, аялрин бахчаяр, поликлиникаяр, яшайишдин кIвалер эцигунин карда куьмекда.
И проект республика патал кар алайдаз элкъвена, гьукуматди субсидияр чара авуналди, инфраструктура туькIуьруналди проектдин иесийриз куьмекни гана. Инвесторди чIехи кархана эцигун патал 1,7 миллиард манат чара авуна. Алай вахтунда комплексда кIвалахдай 125 чка арадал гъанва. Мукьвал вахтара абурун кьадар 200-дав агакьда.
– Кархана киреж акъудунив эгечIнава, – лагьана М. Рамазанова. – Цехди тамамвилелди кIвалахиз эгечIайла, суткада 200 тонн киреж гьазурда. ГьакIни эцигунрин кьурай къаришма акъудиз гатIуннава. Йиса ихьтин 80 агъзур тонн къаришма, 360 агъзур кубический метр бетонни акъуддайвал я. Республика патал им метлеблу кар я. ГьикI хьи, ада эцигунардай карханаяр бес кьадарда герек шейэралди таъминарда. И проект кьилиз акъудуник пай кутур виридаз за сагърай лугьузва. Коллективдиз кархана ачухун за тебрикзава.
Компаниядин учредителрикай сад тир Мегьамедали Багандова къейдна хьи, вад йисуз чIугур зегьмет нетижа галайди хьанва: «Кархана эцигай монтажникриз, эцигунардайбуруз, чаз куьмекар гайи Дагъустандин Гьукуматдиз баркалла.
Къенин югъ чун патал еке метлеб авайди я. Эцигунрин хел экономика вилик тухузвай локомотив я. Герек материалар авачиз, еридин кIвалер, больницаяр, школаяр, аялрин бахчаяр эцигиз жедач. Зун инанмиш я хьи, заводди акъудзавай продукциядихъ игьтияж жеда, чунни виниз тир еридин шейэр акъудиз алахъда».
Компаниядин маса учредитель тир Руслан Жамалудинова комплекс санлай вири Дагъустан патални хийирлуди жедайдакай лагьана.
- Заз къе и важиблу проект кьилиз акъудун патал зегьмет чIугур ва и карда иштиракай виридаз сагърай лугьуз кIанзава. Эцигунардайбуру, инженерри, монтажникри, управленидин къуллугъчийри вад йисуз, гъил-гъиле вугана, зегьмет чIугуна. Инанмиш я хьи, карханади неинки чаз, учредителриз, гьакI санлай республикадизни менфят гуда, – лагьана Р. Жамалудинова.
Комплекс ачухайдалай гуьгъуьниз РД-дин Гьукуматдин Председатель карханадихъ галаз таниш хьана ва ада коллективдихъ галаз суьгьбетар авуна. Гьа са вахтунда зегьметда тафаватлу хьайи къуллугъчияр Дагъустандин Гьукуматдин шабагьар гуналди къейдна. Гьакъисагъ зегьметдай ва къазанмишай агалкьунрай РД-дин Гьукуматдин Гьуьрметдин грамотаяр газдинни бетондин цехдин начальник Серажудин Умаркаеваз ва технолог Евгений Поповаз гана. Котелдин начальник Альфред Ибрагьимовав ва оператор Али Агьмедовав Дагъустандин Гьукуматдин патай разивилин чарар вахкана.
Гьа и юкъуз республикадин премьер-министр «Дтекс» ООО-дин майдандални фена. Ина гамар хрунин проект уьмуьрдиз кечирмишзава. Дагъустанда гамар хрунин сеняткарвал фадлай авайди я. Гила и хел мадни вилик тухудай мумкинвал жеда. Проект кьилиз акъудун патал 1,2 миллиард манат инвестицияр желбнава. Кархана ишлемишиз вахкайла, 150 касдиз кIвалахдай чкаяр жеда.
«Республикадин промышленность вилик тухун патал ихьтин проектар важиблу я. Абур уьмуьрдиз кечирмишун, цIийи цехар ачухдай шартIар тешкилун патал чи патайни куьмек агакьда», – лагьана Мегьамед Рамазанова.
Хийир Эмиров