Дагъустандихъ аграрный сектор еримлу авунин ва патарихъай гъизвай метягьар эвездай затIар гьасилунин еке мумкинвилер ава. Ихьтин фикир, кIвалахдин рекьяй Владивостокда авайла, РД-дин Кьил Сергей Меликова “Интерфаксдиз” малумарна.
“Чахъ чи майданра бул бегьер гудай багъманчивилин хел, якIун ва некIедин производство гегьеншдиз еримлу ийидай, гьакIни икьван чIавалди къецепатан уьлквейрай гъиз хьайи шуьмягъар, бадамар бес кьадарда гьасилиз жедай мумкинвал ава”, — лагьана РД-дин Кьили.
Къейд ийин, Дагъустандин регьбер Сергей Меликова 5-8-сентябрдиз Владивостокда кьиле фейи РагъэкъечIдай патан экономикадин форумда иштиракна. Элкъвей столрин сергьятра аваз субъектрин регьберрихъ ва федеральный дережадин пешекаррихъ галаз уьлкведин экономика еримлу авунин месэлаяр веревирдна. ИкI, Сергей Меликова Россиядин Президент Владимир Путинан регьбервилик кваз кьиле фейи РФ-дин Государстводин Советдин Президиумдин заседанидиз гьазурвал акунин жигьетдай 6-сентябрдиз семинар кьиле тухвана.
«Лезги газет»
