Еке къимет гана
Дагъустан Республикадин Кьил Федор Щукин региондин Ватандин аскеррин хизанрин комитетдин регьбер Мегьрибан Муслимовадихъ галаз гуьруьшмиш ва ада тухузвай ватанпересвилин кIвалахдихъ галаз таниш хьана.
Мегьрибан Муслимова дяведин махсус серенжемдив эгечIай гьа сифте варцара игитвилелди телеф хьайи лейтенант, Жуьрэтлувилин ордендин сагьиб Азим Муслимован диде я. Авай са хва гъиляй акъатай диде, дерт чIугваз, кIвале ацукьнач. Ада «Дидейрин къуват» сообщество тешкилунин карда иштиракна. Дяведин махсус серенжемда телеф хьайи аскеррикай, абурун дидейрикай, несилрин арада алакъайрикай документальный «Руьгьдиз къуватлубур» фильм арадал гъана. РД-дин виликан Кьил Сергей Меликован куьмекдалди фильм вири школайра къалурдайвал авуна.
Мегьрибан Муслимова авунвай крарал рази хьана акъвазнавач. Ватандин итижар патал женг чIугвазвай кьегьалрин хизанрихъ галаз датIана алакъа хуьзва ва ватанпересвилин цIийи проектар кардик кутазва. Федор Щукинахъ галаз кьиле фейи гуьруьшдал гьа и проектрикайни веревирдер авуна.
Несилрин арада алакъа хуьниз, мадни мягькемаруниз, Ватан хуьзвайбурун хизанриз куьмек гуниз талукь проектрин тереф хвена республикадин регьберди. Муслимова дяведин махсус серенжемда телеф хьайи ва гел галачиз квахьнавай аскеррин аялрикай «Игитрин аялар» тIвар алай фильм туькIуьриз гьазур хьанва. Сценарий кхьенва. «Руьгьдиз къуватлубур» фильмдин кьвед лагьай пай арадал гъизва. Ана телеф хьайи аскеррин дидейрикай, абуру республикада тухузвай ватанпересвилин важиблу кIвалахдикай суьгьбетда. «Россиядин халкьар сад ва алакъалу ийизвай рехъ» проектдизни Федор Щукина еке къимет гана.
- Уьлкведин Президент Владимир Владимировича гъилевай йис Россиядин халкьарин садвилинди яз малумарна, – лагьана Ф. Щукина. – Халкьарин арада садвал мягькемарун, чи вилик эцигзавай везифаяр тамамарун важиблу я. И кардиз куьмек гузвай проектар чаз лазимни я. Куьне гъиле кьунвай проектарни абурук акатзава. Абур уьмуьрдиз кечирмишунин карда гьукумдин органривайни куьмек къачу.
Региондин аскеррин хизанрин комитетдин регьберди, «Важиблу крарикай суьгьбетар» проектдин сергьятра аваз, школайра Ватандин ЧIехи дяведин женгерикай, чи баркаллу бубайрин игитвилерикай гьазурнавай фильмаяр къалурунин теклифни гана.
Федор Щукина М. Муслимовадин проектрин тереф хвена ва алава хъувуна: «Тарихдин тарсар рикIел хуьн, акьалтзавай несилдиз ватанпересвилин тербия гун патал уьмуьрдиз кечирмишзавай проектар Дагъустан ва чи чIехи уьлкве патални важиблу я. И кIвалах чна мадни давамарда».
Абад Азадов