1-октябрдиз Красноярскда Махачкъаладин «Динамо» ва чкадин «Енисей» командайрин арада кьиле фейи къугъунин 84-декьикьада чи ватанэгьли Сердер Сердерова ягъай туп себеб яз «Динамо» турнирдин таблицада 1-чкадал хкаж хьана. ИкI, алатнавай къугъунра чи командади 24 очко (гьа икьванбур «Алания» командадихъни ава) къазанмишна. Шад жедай кар мадни ам я хьи, «Динамо» командади гила 5-сеферда къугъунра галаз-галаз гъалибвилер къазанмишнава.
Сердер Сердеров «Динамо» ФК-да къугъваз (ам полузащитник я, 28-нумрадик кваз къугъвада) са акьван гзаф вахт туш. ИкI, алай йисан июлдиз кутIуннавай икьрардалди, чи ватанэгьли и командадик кваз 2023-2024-сезонда къугъвада.
Чахъ авай малуматралди ,чпин ери-бине СтIал Сулейманан райондин Эминхуьряй тир Сердероврин хизан Махачкъалада яшамиш жезва. Буба Мукаил Шерифович — инженер, диде Мелжанат Селимхановна кIвалин кайвани я. Сердеран гъвечIи стха Шарип кьуршахар кьунал машгъул я. Сердер 1994-йисан мартдиз Махачкъалада дидедиз хьана. Футболдал ам лап аял чIавалай машгъул я. 2-нумрадин РСДЮШОР-да тренер Гамаль Бабаеван гъилик спортдин и жуьредай ада сифтегьан вердишвилер къачуна. Гуьгъуьнлай С.Сердеров аялрин «Анжи» командадик кваз къугъвана. Пятигорск шегьерда жаванрин арада кьиле физвай са турнирда чи ватанэгьлидин алакьунар Москвадин ЦСКА команда патал хъсан футболистар хкязавайбурун виле акьуна. Адаз и командадик кваз къугъун теклифна. Гьа икI, чи ватанэгьли ЦСКА, яргъал вахтунда «Анжи», гьакIни «Урал», «Крылья Советов» командайра гьужумдайди яз къугъвана. Гьа са вахтунда Россиядин жуьреба-жуьре яшарин жаванрин хкянавай командайрик квазни ада вичин устадвал къалурна.
2015-2016-йисарин къугъунилай (сезондилай) гуьгъуьниз (Красноярскдин «Енисей» командада къугъвай вахт квачиз) чи ватанэгьлидиз къецепатан уьлквейрин командайра къугъун кьисмет хьана. ИкI, 7 йисуз ада жуьреба-жуьре уьлквейрин командайрик кваз 5 чемпионатда иштиракна. Абурукай Болгариядин «Славия» (иник кваз ада 38 къугъуна иштиракна, 10 туп яна) ва Хорватиядин Запрешич шегьердай тир «Интер» (иник кваз ада 40 къугъуна иштиракна, 16 туп яна) иллаки нетижалубур хьана. С.Сердеров къугъвай командайрик мадни акатзава: «Краковия» (Польша), «Мезёкёвейшд» (Венгрия), «Истра 1961» (Хорватия), «Актобе» (Къазахстан).
8-октябрдиз, нянин сятдин 4-даз, Каспийскда, «Анжи-Арена» стадиондал, Тольяттидин «Акрон» командадихъ галаз «Динамоди» нубатдин къугъун кьиле тухуда. Футболдал рикI алай ксаривай стадиондал атана, къугъуниз пулсуздаказ тамашиз жеда.
Рагнеда Рамалданова
