Ватанпересвилин форум
Дербентдин шамагъаждин тама, шегьердин администрациядин жегьилрин сиясатдин ва спортдин отделди тешкилна жегьилрин ватанпересвилин “Дербент-2022” форум кьиле тухвана. Ана шегьерда кардик квай кьилин ва юкьван пешекарвилин образованидин идарайра кlелзавай студентри иштиракна. Мярекат Россиядин Федерациядин ва Дагъустан Республикадин пайдахар хкажуналди ва гимнар тамамаруналди гатlунна.
Форум Россиядин Федерациядин Игит, МВД-дин полковник Дибиргьажи Мегьамедова ачухна. Ада вичин рахунра акьалтзавай несилдиз ватанпересвилин тербия ва чирвилер гуз зегьмет чlугвазвайбуруз сагърай лагьана ва мярекатдин иштиракчийриз кlелунрани уьмуьрда агалкьунар хьун алхишна.
Анал форумдикай чпин фикирар шегьердин культурадин, жегьилрин сиясатдин ва спортдин крарай управленидин начальник С.Нажафовади ва жегьилрин сиясатдин, спортдин отделдин начальник Х.Баркаева лагьана.
Форумдин сергьятра аваз чlемерукдай ягъунай, страйкболдай, мас-рестлингдай, армрестлингдай, интеллектуал-квестдай акъажунар тухвана.
Куьчеяр цIийикIа туькIуьр хъийизва
Дербент шегьерда куьчеяр цlийикlа туькIуьр хъувунин кlвалахар давам жезва. 500 метр яргъивал алай Канделакидин куьчеда кlвалахар пудратдин “ГРЭН” ООО-ди кьиле тухузва.
Куьчедин яргъивал авайвал инженерный коммуникацияр цlийибуралди эвезнава. Экверин линияр чилин кlаникай тухванва, агьалийрин кlвалер цlийи линийрик кутунва. Куьчедин са паюна тротуар туькlуьрна, куьбеяр эцигнава. Пудратдин тешкилатдин векил Б.Агъарагьимован гафаралди, къир цунин кIвалахар вилик кума.
Кlвалахар кьиле физвай гьал ахтармишиз инал атай шегьердин кьил Р.Пирмегьамедов агьалийрихъ галаз рахана. Вирида ишлемишзавай куьчедин къерехар кьуна, ахъай тийизвайбурун аксина къанундалди лазим тир серенжемар кьабулдайвал я.
Гьа и юкъуз шегьердин кьил Дербентдин кьиблепатан паюна Сальманан куьчедин агъа пата авай кьуд куьче цlийикlа туькlуьр хъийизвай гьалдихъ галазни таниш хьана. Ина кlвалахар “Маяк” ООО-ди кьиле тухузва. Пудратдин тешкилатдин векил З.Магьмудован гафаралди, алай вахтунда объектдал 70% тротуарар ва 80% куьбеяр туькIуьрнава. “Инженерный коммуникацияр тухванмазди, куьчейриз къир цаз гатlунда”, — лагьана ада.
Шегьердин УЖКХ-дин руководитель Р.Алиева кlвалахар графикда къалурнавайдалай фад кьиле тухузвайди къейдна.
Парк гуьрчегарзава
Дербент шегьердин кьил Р.Пирмегьамедов “Инкъилабдин баркалла” парк аваданламишзавай гьалариз килигна. Ана кlвалахар СК “Прогресс” ООО-дин пудратдин тешкилатди тухузва.
Паркунин мулкара 5000 кв.м. мензилда автополивдин ва 5400 метр чилин кlаникай экверин, чиркин ятарин, михьи целди таъминардай линияр чlугунва.
Пудратдин тешкилатдин векил Б.Гьажиева къейд авурвал, алай вахтунда паркуна хейлин кlвалахар кьиле тухванва: искусственный гам, видеогуьзчивал, набататрин кьве кьур, туькIуьрнава. Тротуардин плитка твазвай чкаяр, бетон цана, гьазурнава. Амфитеатр ва сегьне туькlуьрунин кlвалахар акьалтlарзава. 70 процент мулкуна тарарни набататар цанва.
И проектдал авторвилин гуьзчивал тухузвай Е.Федоровадин гафарай малум хьайивал, туькlуьрзавай фонтан гранитда твада. Ана цавуз яд гадардай ирид кьилин ва са шумуд цин шуькlуь тахар (струя) жеда.
Къагьриман Ибрагьимов
