Дагъустандин Кьил Сергей Меликов Арабрин Сад хьанвай Эмиратрин (ОАЭ) Россияда авай посол Могьаммад Агьмад Султан Есса Аль Джаберахъ галаз гуьруьшмиш хьана.
Терефар ОАЭ-дин делегация региондиз атунин ва инвестицийрин умуми проектриз килигунин гьакъиндай икьрар хьана.
“Санал кIвалахунин жигьетдай авай мумкинвилерикай ва векилханадин делегация пландин бинедаллаз Дагъустандиз мугьман хьунин месэладикай тамамдаказ рахана. Умуд кутунвайвал, чи саналди тир, гьа жергедай яз инвестицийрин, яшайишдин ва культурадин хилерай проектар неинки чи республика, гьакIни кьве уьлкве патални итижлубур ва менфятлубур жеда”, — кхьена ислен юкъуз Сергей Меликова вичин Telegram-каналда.
Адан гафаралди, Дагъустанди международный алакъаяр гегьеншарунин кIвалах кьиле тухузва. Идалай вилик регионди Ирандихъ ва Белоруссиядихъ галаз санал кIвалахдай рекьер къейднай.
“Республикадин экономикадин жигьетдай международный алакъаяр гегьенш хьуни рикIиз хушвал гузва: чи суьрсетдиз къецепатан уьлквейри итиж ийизва, гьам кьиблепатахъ, гьамни рагъэкъечIдай патахъ галаз логистика еримлу авунин гьакъиндай Дагъустандихъ авай мумкинвилерикай лагьайтIа, исятда вири дережайра ачухдаказ малумарзава”, — алава хъувуна С.Меликова.
Идалай вилик хабар гайивал, Исламдин Республика Ирандикай Россиядиз пуд лагьай уьлквейрин куьмекдалди гъизвай метягь, гьакIни Россиядай къецепатан уьлквейриз маса гузвай техил ва набататрин ягълу патал транспортдин гьалкъа (центр) хьун мумкин я.
Иранди гьакIни уьлквейрин арада гьавадай транспортдин алакъа виликди тухуниз, кьилди къачуртIа, Махачкъаладин ва Тегерандин арада авиаалакъа тайинаруниз итиж ийизва.
Чи мухбир
