Дагъустандин хабарар
Рекьера дуьшуьшар
Дагъустанда йисан эвел кьилелай инихъ рекьера арадал атай 836 ДТП регистрация авунва. Идакай РД-дин Гьукуматдин телеграм-каналди хабар гузва.
Кьилди къачуртIа, чешмеди къейдзавайвал, республикадин мулкарал 6 вацран къене 836 авария арадал атанва. Абурун нетижада 131 кас – телеф, 1141 касдал хирер хьана. Гьа и гьисабдай яз, 125 авариядик 10 аял кьена, 136-дал хирер хьана.
Ахтармишунри къалурзавайвал, рекьера гзафни-гзаф арадал къвезвай аварияр улакьар сад-садахъ галукьунихъ галаз алакъалу я. Гуьгъуьнал ихьтин дуьшуьшар ала: кIвачи-кIвачи къекъвезвай ксар машинрик акатун, алабар хьун, гьерекатдик квачир, акъвазарнавай улакьра акьун...
Хабар гузвайвал, эхиримжи пуд йисуз мотоциклийрихъ галаз алакъалу аварийрин кьадар хейлин артух хьанва.
ЧIехи серенжем
Дагъустанда вацIара лазим кIвалахар тамамарун патал 6,5 миллиард манатдив агакьна пулдин такьатар чара ийизвай чIехи программа кардик акатда. Идакай Дагъустандин ЦУР-дин телеграм-каналди раижзава.
Чешмеди къейдзавайвал, республикада 2026-2029-йисара вацIар хуьнин жигьетдай виликамаз серенжемар кьабулдай мярекатрин план тестикьарнава.
Адак 36 мярекат акатзава: гидротехникадин имаратар эцигун ва капитальный ремонт авун, Терек, Аксай, Акташ, Самур ва маса вацIара кIан деринарунин кIвалахар кьиле тухун. Участокрин умуми мензил 164,48 километрдикай ибарат жеда. 6,473 миллиард манат пулдин такьатралди таъминарда.
Кьилди къачуртIа, 2026-йисуз 13 мярекат кьиле тухун фикирда кьунва. Айхый, Къара-Самур ва Акташ вацIарал кIвалахар кьиле тухунив гьеле гатIуннава. Терек ва Аксай вацIарал гидротехникадин имаратар арадал хкунин контрактар 1-августдалди кутIунун пландик кутунва.
12 000 зенг
Дагъустандин газдин хилен къуллугъчийри зур йисан къене 12 агъзур арза кьабулнава. Идакай «Дагъустан патал газ» телеграм-каналди хабар гузва.
Кьилди къачуртIа, чешмеди къейдзавайвал, «Газпром межрегионгаз Махачкала» компаниядин ифей линиядин операторар 2026-йисан сад лагьай зур йисуз агьалийрилай атанвай 12 агъзур арзадиз килигна.
Агьалийри гзафни-гзаф ихьтин месэлайрин патахъай зенгерзавай: счетчикди къалурзавай рекъемар агакьарун, гьакъидихъ галаз алакъалу хабарар кьун, газ гъунин ва газдин тадаракдиз техникадин жигьетдай къулугъ авунин икьрарар кутIуниз талукь месэлаяр чирун.
Компаниядин генеральный директор Ризван Мурадова раижзавайвал, ифей линия агьалийрихъ галаз алакъа хуьдай рехъ я. Агьалийрихъ галаз алакъада хьуни газдин компаниядин къуллугъчийриз инсанрин игьтияжар гьихьтинбур ятIа чирунин, тешкилатдин кIвалах лап хъсанарунин рекьяй куьмекзава.
Ифей линиядин нумра – 8 800 200 98 04.
Хейлин пай физватIа
Эгер коммунальный къуллугърай гузвай гьакъидиз доходдин хейлин пай физватIа, агьалийривай эвездин пулдикай (субсидия) ва я яшайишдин рекьяй тайин кьезилвиликай менфят къачуз жеда. Кьилин шартI – ЖКХ-дай бурж тахьун я. Идакай «Дагъустан патал газ» телеграм-каналди хабар гузва.
Чешмеди раижзавайвал, субсидия чпи ЖКУ-диз ийизвай харжияр квартирада (кIвале) регистрация авунвай хизандин векилрин доходдин умуми кьадардин 22 процентдилай гзаф тир гьар са хизандивай къачуз жезва.
Тайин кьезилвилер фикирда кьунвайбурук инвалидар, гзаф аялар авай хизанар, пенсионерар ва мсб. акатзава.
Къейдзавайвал, эвездин пулдин кьадар коммунальный къулугъриз ийизвай харжийрин умуми кьадардин 50 процентдал кьван рекъемдикай ибарат жеда.
Раижзавайвал, и жигьетдай арза МФЦ-дин, «Госкъуллугърин» порталдин куьмекдалди ва я жув яшайишдин рекьяй хуьдай органриз фена гуз жеда. Жував хьана кIанда: паспорт, яшайишдин рекьяй тайин кьезилвал къачудай ихтияр авайди тестикьарзавай документар, хизандин составдин справка, яшамиш жезвай чка тестикьарзавай документ ва ЖКУ-дин гьакъи ганвайди къалурзавай квитанцияр.
Гьазурайди – Муса Агьмедов