Уьлкведин Пенсийрин фондуни рекъемрин рекьяй вилик финин, алакъадин ва массовый коммуникацийрин министерстводихъ галаз санал “Госуслуги” порталда жегьил дидейриз кIвачел залан вахтунда гьар вацра гузвай пособидиз талукь махсус сервис кардик кутунва.
“Лезги газетдиз” РД-дин Пенсийрин фондунин пресс-къуллугъди хабар гайивал, ихтилат физвай пособие къачудай ихтияр ЦЗН-ди (центр занятости населения) кIвалахдилай элячIай йикъалай йисан къене бейкарар яз тестикьарнавай дишегьлийриз ава. И дуьшуьшда кIвалахдилай элячIунин (кIвалахдикай магьрум хьунин) себеб кархана агалун ва я адан кIвалах михьиз акъваз хьун лазим я.
Пособие къачун патал “Госуслуги” порталда “Пособие по беременности и родам для уволенных женщин” сервис жагъурна, ана жувакай малуматар (персональные данные) туна кIанзава. Гуьгъуьнлай пособие гьи къайдада къачуз кIанзаватIа хкязава ва электронный арза рекье твазва.
Асул гьисабдай гзаф дуьшуьшра пособие къачун патал гьа и къайдадикай менфят къачун бес жезва. Амма тайин тир делилрин гьакъикъивал ахтармиш хъийизвай дуьшуьшарни гьалтзава. Мисал яз, аял хайивилин гьакъиндай шагьадатнамадиз талукь месэлаяр. Ихьтин чIавуз “Госуслуги” порталда авай хсуси кабинетдиз Пенсийрин фондуниз алава гьихьтин делилар агакьар хъувуна кIанзаватIа къейднавай махсус электронный кагъаз хкведа.
Пособие гунин къарар арза рекье турдалай кьулухъ 10 йикъан къене кьабулзава. Эгер пособие тагудайвал хьайитIа (бязи себебар аваз), и кардикай арза рекье турдалай кьулухъ 3 йикъан къене хабар гузва. Пособие ам гудай къарар кьабулайдалай кьулухъ 5 йикъан къене чара ийизва.
«Лезги газет»
