Государстводин программаяр, инвестицийрин проектар уьмуьрдиз кечирмишун себеб яз, СтIал Сулейманан районда, багъманчивал, уьзуьмчивал, майвачивал хьиз, малдарвални виликди физва. И хилен карханайрани алай аямдин цIийи технологияр, кIвалахдин кIвенкIвечи ва менфятлу къайдаяр кардик кутазва.
Малдарвал вилик тухузвай, цIийи технологияр кардик кутазвай карханайрикай яз, «АлиЯк» ООО-дин тIвар кьаз жеда.
Райондин хуьруьн майишатдин ва суьрсетдин управленидин начальник Къазиагьмед Къазиагьмедовахъ ва адан заместитель Къазиагьмед Абумислимовахъ галаз чун и йикъара карханадин калун «Зардиян» участокдиз фена. Механизаторарни рабочияр мал-къарадиз алафар гьазурунал машгъул тир.
Карханадихъ векьин тумар цанвай 105 гектар мулк ава. Чун фейила махсус агрегат галай са трактор — векьер ягъунал, кьвед лагьайди — векьер маргъвара тунал ва пуд лагьай трактор (цIийи маркадин) махсус агрегатдалди янавай векьикай сенаждин элкъвей таяяр кьунал (шикилда) машгъул тир.
И къайдада сенаж гьазурун неинки чи районда, гьакI санлай Кьиблепатан Дагъустанда (мумкин я, республикадани) цIийивал я. Техникадикай, акалзавай агрегатрикайни гьа икI лугьуз жеда.
Карханадин кьилин пешекар Мирза Рагьимова чаз лагьайвал, икьван чIавалди ана сад лагьай сеферда ягъай векьикай гьар садай 800 килограмм къвезвай сенаждин 400-далай виниз таяяр кьунва. И кар давамарзава. М.Рагьимова алава хъувурвал, ина шаз уьруьшрай пуд сеферда векьер янайтIа, цIи векьер кьуд сеферда ягъун планламишнава.
Хазран Кьасумов
