22-апрелдиз, гатфарин чими юкъуз, Каспийск шегьердин агьалийрин кIвалериз чимивал агакьарзавай карханадин — «КаспийТеплоСервис» ООО-дин коллективди гзаф чкайра ремонтрин кIвалахар кьиле тухвана, гьакIни карханадин дараматар авай чкаяр, гьаятар, куьчейрин къерехар къайдадиз гъана.
И кардик кьил кутур ва активнидаказ куьмекар гайи «КаспийТеплоСервис» ООО-дин генеральный директор Тагьир Агьмедоваз, участокдин начальник Руслан Шихкеримоваз, гьакIни ремонтрин рекьяй мастер Максимаз карханадин коллективди ва жемятди рикIин сидкьидай сагърай лугьузва.
“Чи коллективди амай кIвалахарни, я гьавадин шартIариз, я тIегъуьнриз-карантинриз килиг тавуна, вахт-вахтунда кьилиз акъудзава. Вучиз лагьайтIа, чаз чизва — чи карда куьлуь-шуьлуьяр авач. Эгер нукьсанриз рехъ гайитIа, пака абуру пашман нетижайрал гъун мумкин я”, — лугьузва карханадин слесарь Ярали Мегьамдалиева.
Гатфарин кIвалахрикай яз, рабочий коллективди канализациядин къуйриз лацу ширер яна, абурал алай къалпагъар къайдадиз хкана, бязибур дегишарна. И карда сварщикар тир Омар Балаугъланов, Силим Балахаев тафаватлу хьана.
Къейд ийин хьи, “КаспийТеплоСервис” карханадин гьакъисагъ зегьметчийрикай ва тежрибалу пешекаррикай ибарат коллективдин вири кIвалахар кьетIендиз къейд авуниз, баркалладиз лайихлубур я. ИкI, абуру агьалийрин кIвалер чимивилелди таъминарун патал, югъ-йиф ва я кьуьд-гад лугьун тавуна, зегьмет чIугвазва. Инженерар, сварщикар, слесарар, экскаваторрал кIвалахдайбур, турбаяр чIугвадайбур — гьуьрметдивди ва намуслудаказ кIвалахзавай, хиве авай везифайрин важиблувал дериндай гьиссзавай абурулай Каспийск шегьердин агьалияр иллаки рази я.
Мад са баркаллу кIвалахдикай лугьуз кIанзава заз инал. “КаспийТеплоСервис” ООО-дин коллективди кьабулай къарардалди, коллективдин са йикъан мажибар Луганскдин ва Донецкдин халкьдин республикайрай катнавайбуруз куьмек гун патал чара авунва. Карханадин профкомдин председатель Жабраилов Гьанифади къейд авурвал, и къарар коллективди рейсадвилелди кьабулнава.
Амина Муслимова
