Алай вахтунда Дагъустандин чIижер­хъанрин къайгъуяр къалин я: абуру­ гатуз чIугур зегьметдин бегьер – вирт кIватI­зава. РД-дин хуьруьн майи­шат­дин­ ва недай суьрсетдин ми­нис­терст­водин­ пресс-къуллугъди хабар гузвай­вал, надир тIебиат себеб­ яз, дагъустан­ви чIи­жерхъанри акьалтIай хъсан еридин вирт гьасилзава. Дагъустандин­ вирт базар­да­ девлетлу еридинди ва хийирлуди­ яз гьисабзава. Ихьтин суьр­­сет вич-виче­лай арадал къвезвач, адан далудихъ чIижерхъанрин чIехи зегьмет гала. Куьнуьяр санай масаниз куьчарзавай майишатрин къайгъуяр ла­гьайтIа, иллаки пара я.

Мисал яз, Ахвах районда кардик квай «Кили» КФХ-дин зегьметкешри вирт гьасилун патал вири республикада сиягьат авуна лагьайтIа жеда. Сезондин вахтунда абуру чIижерин куьнуьяр эцигай мулкар агъа кIан цIуд сеферда дегишна.

Майишатдиз Мегьамедкьасум Салимо­ва регьбервал гузва. Адан фикирдалди­, куь­нуьяр куьчарунин нетижада арадал къвез­вай виртIедин дад тафаватлуди жезва. Гьеле гатфарихъай гатIунна майи­шат­ди куьнуьяр арандиз, Ногъай район­дин яйлахриз авудзава. Гатун юкьвара­ абур Къули райондиз, гьуьлуьн дережадилай саки­ 2000 метрдин кьакьандиз хкизва. Ина чIи­жери дагъдин цуьк акъуд­навай чуьл­лерай гзаф хийирлу миже кIватIзава.

М. Салимова къейдзавайвал, чIижер­хъанвал вири хизандин пеше я. Асул гьисабдай и карда адаз уьмуьрдин юлдаш Альбинади куьмекзава. Гьам аранда, гьамни дагъда абур санал чпин рикI алай пешедал машгъул жезва.

Лагьана кIанда, «Кили» КФХ-ди майи­шатдин кIвалах гьукуматди гузвай куьмекдикай менфят къачуна вилик тухуз­ва. М. Салимова мукьвал-мукьвал чIижер­хъанвилин сергьятар гегьеншарун патал субсидияр къачузва.

Тежрибалу чIижерхъандин гафаралди, зулун эхирдай куьнуьяр Буйнакскдин районда авай Терменлик лугьудай чкадиз акъуддайвал я. Гатфаралди абур гьана амукьда.

Агьмед  Магьмудов