И гьафтеда Дагъустандин сиясатдин уьмуьрда кьиле фейи виридалайни лишанлу вакъиа сад-садан гуьгъуьналлаз кар алай пуд министерстводин кьиле цIийи ксар тайинарун я.

ИкI, РД-дин Кьилин везифаяр вахту­налди тамамарзавай Фёдор Щукинан Указдалди республикадин эцигунрин, архитектурадин ва ЖКХ-дин министрдин везифаяр вахтуналди тамамарзавайди яз Анвар Шамилов тайинарнава. Чахъ авай делилралди, виликдай ада Россия­дин эцигунрин министерстводихъ галаз ала­къа­лу мулкар вилик тухунин фондунин директор яз кIвалахзавай. РикIел хкин, икьван чIавалди ихтилат физвай министерстводин кьиле Бахтияр Уллаев авай.

Кьвед лагьай министерство финансринди я. Къейд ийин хьи, 2023-йисуз Сергей Меликован Указдалди респуб­ликадин Гьукуматдин къурулушда кар алайбурукай сад яз гьисабзавай и ведомство Шамил Дабишевал ихтибарнай. Адалай вилик ада Леваши райондиз регьбервал ганай. Гила Шамил Дабишев Заур Имрановалди эвезнава. Малум тирвал, министрдин къуллугъдал тайинардалди, З. Имранова Россиядин финансрин министерстводин са департаментдин директордин заместитель яз кIвалахна.

Пуд лагьайди – хуьруьн майишатдин ва недай суьрсетдин министерство. Анин кьиле Иван Голуб тайинарнава. РД-дин Кьилин ва Гьукуматдин Администрацияди раижнавай малуматрай якъин жезвайвал, 2012-2019-йисара цIийи министрди РФ-дин транспортдин министерст­вода отделдин начальникдин заместитель­ яз кIвалахна. Гуьгъуьнлай са йисуз Росавиа­циядин управленидин начальникдин заместителдин везифаяр тамамарна. 2026-йисан июндалди РФ-дин хуьруьн ма­йишатдин агроаналитикадин центрадин кьиле акъвазнавай.

РикIел хкин, 2025-йисан 24-октябрдиз и министерстводин кьиле Сергей Меликован Указдалди Шамил Рамазанов тайи­нарнай. Виликдай ада Къули райондиз регьбервал гузвай. 

Чи мухбир